Maskoŭski akruhovy vajskovy sud prysudziŭ pałkoŭnika Vitala Zajčanku da dvuch hadoŭ umoŭna. Pavodle dadzienych śledstva, u rasparadžeńnie ukraincaŭ, jakija ramantavali noŭtbuk aficera, trapiŭ sakretny zahad ministra abarony RF.
Zajčanka z 2009 hoda zajmaŭ pasadu načalnika 5 adździeła Upraŭleńnia načalnika vojskaŭ radyjoelektronnaj baraćby i adkazvaŭ za arhanizacyju radyjoelektronnaj abarony. Pałkoŭnik mieŭ dostup da źviestak z hryfami «asabliva sakretna» i «całkam sakretna». Častku sakretnych źviestak jon zachoŭvaŭ na svaim noŭtbuku Acer.
Kali noŭtbuk złamaŭsia, Zajčanka addaŭ jaho na ramont siastry — hramadziancy Ukrainy. Jana zabrała jaho va Ukrainu i addała spačatku adnamu, a potym inšamu kampjutarnamu majstru dla ramontu i rasšyfroŭki infarmacyi.
U rasparadžeńnie tych, chto ramantavaŭ kampjutar, trapiŭ sakretny zahad ministra abarony Rasii, a taksama pastanova ŭrada, jakija rehulujuć pracu sistemy radyjołakacyjnaj baraćby.
Pavodle prysudu, pałkoŭnik nie źbiraŭsia pradavać sakretnuju infarmacyju, tamu jamu nie zaličvajecca dziaržaŭnaja zdrada. Da ciažkich nastupstvaŭ jaho dziejańni nie pryviali. Jon pryznany vinavatym u vydavańni źviestak, jakija achoŭvajucca dziaržavaj (častka 1 artykuła 283 KK).
