Z Babrujskaha zavoda traktarnych detalaŭ i ahrehataŭ (BZTDiA) zvolnienyja naładčyki 6-ha i 5-ha razradaŭ Alaksandr Varankin i Alaksandr Hramyka, členy Svabodnaha prafsajuza Biełaruskaha (SPB).
Nahadajem, 25—27 sakavika staršynia piarvičnaj arhanizacyi SPB Michaił Kavalkoŭ i jašče 11 rabotnikaŭ zavoda praviali papieradžalnuju haładoŭku. Jaje pryčynaj jany nazyvali nievykanańnie administracyjaj pradpryjemstva dasiahnutych u studzieni damoŭlenaściaŭ pra pačatak pieramoŭ ab kalektyŭnym dahavory. Siarod patrabavańniaŭ było taksama spynieńnie pieraśledu rabotnikaŭ pradpryjemstva za ŭdzieł u dziejnaści SPB; ustaranieńnie dyskryminacyjnych punktaŭ kalektyŭnaha dahavora i raspaŭsiudžvańnie jaho dziejańnia na ŭsich rabotnikaŭ zavoda; zabieśpiačeńnie staršyni piarvički bieśpieraškodnaha dostupu na pradpryjemstva. Tady administracyja zavoda nijak nie adreahavała na akcyju.
Varankin i Hramyka byli ŭdzielnikami kalektyŭnaha isku da zavoda nakont niavypłaty im premii za kulturu vytvorčaści ŭ kancy 2013 hoda, nazvaŭšy heta dyskryminacyjaj pa prykmiecie prynaležnaści da Svabodnaha prafsajuza. Babrujski sud zadavoliŭ ich isk i abaviazaŭ kiraŭnictva pradpryjemstva vypłacić premiju pa 300 tys. rubloŭ kožnamu.
Pavodle słoŭ Kavalkova, suprać zvalnieńnia rabotnikaŭ vystupiła kiraŭnictva cecha. «Majstry ŭčastka źviarnulisia da namieśnika dyrektara pa vytvorčaści Juryja Puževiča z prośbaj pakinuć na pracy Varankina. Namieśnik dyrektara zajaviŭ, što takich ludziej zvalniać nielha», — skazaŭ prafsajuzny lidar. Jon adznačyŭ, što dyrektar zavoda Alaksandr Ahranovič, jaki źjaŭlajecca taksama deputatam Mahiloŭskaha abłsavieta, nasupierak vytvorčym intaresam pryniaŭ rašeńnie zvolnić hetych rabotnikaŭ.
Kavalkoŭ paviedamiŭ, što Varankin udzielničaŭ u sustrečy z hienieralnym sakratarom Mižnarodnaj kanfiederacyi prafsajuzaŭ Šaran Baroŭ u siaredzinie vieraśnia, dzie ŭźniaŭ temu zvalnieńniaŭ rabotnikaŭ zavoda za prynaležnaść da Svabodnaha prafsajuza. «Daviedaŭšysia ab tym, što Alaksandr Varankin byŭ na sustrečy z Šaran Baroŭ, Ahranovič pryhraziŭ, što Varankin u Babrujsku pracu sabie nie znojdzie», — skazaŭ Kavalkoŭ. Jon taksama paviedamiŭ, što raniej ab admovie praciahvać kantrakty z Varankinym i Hramykam, pry niedachopie na zavodzie vysokakvalifikavanych śpiecyjalistaŭ, było paviedamlena Ministerstvu pracy i sacyjalnaj abarony.
Varankin i Hramyka paćvierdzili svajo zvalnieńnie z-za prynaležnaści da Svabodnaha prafsajuza. U toj ža čas jany nie škadujuć ab tym, što aktyŭna ŭdzielničali ŭ adstojvańni pravoŭ pracoŭnych. «Jašče bolš aktyŭna treba było ŭdzielničać, tamu što na zavodzie biaźmiežža, ludźmi pahardžajuć. Rabočyja kala stanka atrymlivajuć zarpłatu pa 2 młn. rubloŭ», — zajaviŭ Varankin.
Dyrektar pradpryjemstva Alaksandr Ahranovič admoviŭsia ad kamientaryjaŭ adnosna zvalnieńnia Varankina i Hramyki.
Nahadajem, u mai administracyja BZTDiA nie praciahnuła kantrakt členu Svabodnaha prafsajuza Biełaruskaha, udzielniku sakavickaj haładoŭki na pradpryjemstvie hruzčyku Viktaru Vosipavu, niahledziačy na prośbu kalektyvu i stanoŭčuju charaktarystyku načalnika ŭčastka.
