U Minsku na rehulavanych skryžavańniach źjavicca raźmietka zialonaha koleru dla infarmavańnia kiroŭcaŭ ab pierasiačeńni ź viełasipiednym pierajezdam.
Ab hetym paviedamiła kiraŭnik pres-słužby staličnaj Dziaržaŭtainśpiekcyi Taćciana Charlinskaja.
«Raźmietka budzie pryciahvać uvahu kiroŭcaŭ, infarmavać viełasipiedystaŭ i piešachodaŭ ab paasobnych zonach pierasiačeńnia prajeznaj častki. Takoje novaŭviadzieńnie aktyŭna vykarystoŭvajecca ŭ mnohich krainach śvietu, adnak koler raźmietki ŭ kožnaj krainy svoj», — raskazała Taćciana Charlinskaja.
Pavodle słoŭ kiraŭnika pres-słužby, zialonuju raźmietku płanujecca nanieści ŭ Minsku ŭ miescach intensiŭnaha viełaruchu.
«U jakaści piłotnaha prajekta vybrana skryžavańnie pr. Pieramožcaŭ — Krynica. Tut buduć ustanoŭlenyja darožnyja znaki i tablički, jakija papiaredžvajuć ab najaŭnaści rehulavanaha viełasipiednaha pierajezda, i adkarektavanaja rabota śviatłafornaha abjekta», — dadała jana.
Taksama zialonaja raźmietka budzie nanosicca pry budaŭnictvie novych śviatłaforaŭ. Heta rabota pravodzicca ŭ chodzie realizacyi Kancepcyi raźvićcia sistemy viełasipiednaha ruchu ŭ Minsku, jakaja praduhledžvaje vykarystańnie isnujučaj transpartnaj infrastruktury dla viełasipiednaha ruchu.
