Prafsajuz dziejnaha ŭ Vilniusie biełaruskaha Jeŭrapiejskaha humanitarnaha ŭniviersiteta (EHU) rychtuje pazoŭ u sud nakont masavaha zvalnieńnia vykładčykaŭ, paviedamiŭ siabra kirujučaha savieta prafsajuza i siabra sienata VNU Andrej Ralonak.
Pavodle jaho słoŭ, bolš jak u 100 vykładčykaŭ EHU 1 kastryčnika zakončylisia kantrakty. «Pavodle našych źviestak, niekatorym vykładčykam prapanavanaja praca pa hadzinach. My pakul nie viedajem, ci zhadzilisia jany pracavać na takich umovach», — dadaŭ jon.
Viadoma, što z bolšaściu pradstaŭnikoŭ płatformy «Za novy EHU», jakaja vystupała suprać palityki administracyi VNU, kantrakty nie byli praciahnutyja. Vykładčyki atrymali paviedamleńni administracyi VNU ab tym, što ŭ ich pasłuhach EHU bolš nie maje patreby. Ralonak adznačyŭ, što 12 pradstaŭnikoŭ demakratyčnaj płatformy «Za novy EHU» źjaŭlalisia siabrami sienata ŭniviersiteta.
Jak paviedamlałasia raniej, na pieršym etapie adboru asnoŭnaha vykładčyckaha składu ŭ EHU byŭ praviedzieny adkryty konkurs na zamiaščeńnie 17 vykładčyckich pasadaŭ pavodle pryncypu poŭnaj zaniataści z zaklučeńniem pracoŭnych dahavoraŭ na piać hadoŭ; na druhim — pracoŭnyja dahavory terminam na hod zaklučanyja z 61 vykładčykam. Adnak, adznačyŭ Ralonak, va ŭniviersitecie na asnovie roznych form najmu ŭ minułym navučalnym hodzie pracavała 245 vykładčykaŭ.
Rabotniki, ź jakimi dahavory nie praciahnutyja, rychtujuć pazoŭ u sud, skazaŭ Ralonak.
Jon taksama paviedamiŭ, što najbližejšym časam pavinny być pryznačanyja słuchańni ŭ sudzie pa pazovie EHU da kantralora pa akademičnaj etycy i pracedurach Litvy, u jakim Ralonak vystupaje trecim zacikaŭlenym bokam. Kantralor u mai paćvierdziŭ niepravamiernaść niekatorych dziejańniaŭ kiraŭnictva ŭniviersiteta ŭ adkaz na padadzienuju sienatam EHU skarhu ab parušeńniach u pracy kiraŭnictva ŭniviersiteta. Siarod inšaha parušeńni byli adznačanyja pry praviadzieńni konkursu na zamiaščeńnie vykładčyckich pasad.
Kantralor rekamiendavaŭ rektaru EHU prainfarmavać ahulny schod saŭładalnikaŭ ab vyjaŭlenych parušeńniach i adznačyŭ, što «ŭstanoŭlenyja parušeńni akademičnaj etyki i pracedury pavinny być likvidavanyja nieadkładna». Adnak administracyja EHU pradoŭžyła pravodzić konkurs, nastojvała, što jaho praviadzieńnie poŭnaściu adpaviadaje pałažeńniam statuta EHU i zakonu Litvy ab navucy i adukacyi, i padała pazoŭ u sud na kantralora.
Taksama ŭ sudzie Vilniusa pačaŭsia razhlad pazovu staršyni sienata EHU prafsajuza Paŭła Cieraškoviča da Jeŭrapiejskaha humanitarnaha ŭniviersiteta. 5 lutaha Cieraškoviča zvolniki ź EHU, daterminova pierapyniŭšy ź im kantrakt.
Kanflikt u EHU pamiž administracyjaj i sienatam VNU, źviazany z praviadzieńniem reformy prafiesarska-vykładčyckaha składu, abvastryŭsia ŭ siaredzinie studzienia 2014 hoda.
Jeŭrapiejski humanitarny ŭniviersitet byŭ adkryty ŭ Minsku ŭ 1992 hodzie. U 2004 hodzie biełaruskija ŭłady, niezadavolenyja samastojnaściu jaho kiraŭnictva, zakryli VNU. U 2005 hodzie EHU adnaviŭ pracu ŭ Vilniusie ŭ statusie biełaruskaha ŭniviersiteta ŭ vyhnańni. Z momantu stvareńnia EHU rektaram byŭ jaho zasnavalnik akademik Anatol Michajłaŭ, jaki 30 vieraśnia pakinuŭ hetuju pasadu i pryniaŭ prapanovu zaniać novuju, tolki što stvoranuju pasadu prezidenta ŭniviersiteta. Va ŭniviersitecie vučacca prykładna 1.500 studentaŭ, pieravažna ź Biełarusi.
