Prajekt novaha hienpłana raźvićcia Minska maje patrebu ŭ surjoznaj dapracoŭcy, zajaviŭ na naradzie pa pytańniach karekciroŭki hetaha dakumienta pamočnik prezidenta — hałoŭny inśpiektar pa horadzie Minsku Alaksandr Jakabson.
«Novy hienpłan raźvićcia stalicy maje patrebu ŭ surjoznaj dapracoŭcy. Nieabchodna abmierkavańnie ŭsimi zacikaŭlenymi bakami: kiraŭnictvam horada, pradstaŭnikami kamiteta ekanomiki Minharvykankama, BiełNDI horadabudaŭnictva i inšych słužbaŭ», — skazaŭ Alaksandr Jakabson. «Ciapier adzinstva ŭ ich pazicyjach niama», — dadaŭ jon.
Jaho słovy padtrymaŭ staršynia kamiteta budaŭnictva i inviestycyj Minharvykankama Fiodar Rymašeŭski. Jon nahadaŭ, što ŭ stalicy płanujecca skaracić abjomy budaŭnictva žylla, pakolki svabodnych placovak praktyčna nie zastałosia.
«U 2015 hodzie ŭ horadzie płanujecca pabudavać amal 900 tys. kv.m žylla, da 2017 hoda vyjści na 500 tys. kv.m u hod. Siońnia najbolš pierśpiektyŭnym dla šmatpaviarchovaj zabudovy źjaŭlajecca žyły kompleks «Notynhiem». Tam płanujecca pabudavać 1,2 młn. kv.m žylla. Ź ich 900 tys. kv.m pabudujuć za košt biudžetu horada, 300 tys. kv.m addadziena pryvatnamu zabudoŭščyku. Dakumienty ŭžo znachodziacca na ekśpiertyzie», — skazaŭ jon.
Na naradzie supracoŭniki ŭnitarnaha pradpryjemstva «Minskhrada» pradstavili svaje prapanovy pa karekciroŭcy hienpłana raźvićcia stalicy. U pryvatnaści, jany razhladali mahčymaści pavieličeńnia abjomaŭ budaŭnictva žylla ŭ Minsku, asvajeńnia častki terytoryi Ščomyślicy, Zialonaha Bora. Taksama śpiecyjalisty raskazali ab płanavanym zaviaršeńni farmiravańnia rajonaŭ masavaha žyllovaha budaŭnictva Lebiadziny, Kamiennaja Horka, Dambroŭka, Miadźviežyna, Sucharava i Łošyca.
Prajekt karektury hienieralnaha płana raźvićcia Minska budzie pradstaŭleny na razhlad kiraŭnictva respubliki da kanca biahučaha hoda.
