Biełaruskaja delehacyja 29 vieraśnia — 1 kastryčnika znachodziłasia ź vizitam u Brusieli dla ŭdziełu ŭ trecim raŭndzie kansultacyj pa pytańniach madernizacyi pamiž Biełaruśsiu i Jeŭrasajuzam. Jak paviedamlaje pres-słužba MZS Biełarusi, uznačalvała delehacyju namieśnik ministra zamiežnych spraŭ Alena Kupčyna.
U skład biełaruskaj delehacyi taksama ŭvajšli pradstaŭniki ministerstvaŭ zamiežnych spraŭ i transpartu. Delehacyju ES, jakaja składałasia z ekśpiertaŭ Jeŭrapiejskaj słužby źniešnich dziejańniaŭ (JESZD) i Jeŭrapiejskaj kamisii, uznačaliŭ dyrektar departamienta Rasii, Uschodniaha partniorstva, Centralnaj Azii, rehijanalnaha supracoŭnictva i ABSIE JESVD Hunar Vihand.
«Baki abmierkavali pierśpiektyvy supracoŭnictva ŭ śfierach transpartu i łahistyki, enierhietyki i achovy navakolnaha asiarodździa, — adznačajecca ŭ paviedamleńni. — Byli razhledžany pytańni kiravańnia vodnymi resursami, utylizacyi adchodaŭ, zachavańnia bijałahičnaj raznastajnaści, palapšeńnia radyjołahičnaha kantrolu, raźvićcia enierhietyčnaj i transpartnaj sistem Biełarusi, vykarystańnia alternatyŭnych krynic enierhii, dałučeńnia Biełarusi da tematyčnych miechanizmaŭ i prahram ES».
Hałoŭnaj metaj kansultacyj pa madernizacyi źjaŭlajecca «vyznačeńnie lepšaj budučaj formy ŭzajemadziejańnia pamiž uradam Respubliki Biełaruś i Jeŭrapiejskim sajuzam».
U ramkach vizitu ŭ Brusiel adbylisia taksama sustrečy Kupčynoj ź jeŭrakamisaram pa pašyreńni i Jeŭrapiejskaj palitycy susiedstva Štefanam Fiule, namieśnikam hienieralnaha sakratara JESVD Chielhaj Šmid i niekatorymi deputatami Jeŭrapiejskaha parłamienta, padčas jakich byli abmierkavany pytańni raźvićcia adnosin pamiž Biełaruśsiu i ES.
