Multfilmy pra Toma i Džery, jakija pakazvaje dla svaich padpisčykaŭ televizijny internet-kanał Amazon Prime Instant Video, u apošni čas supravadžajucca papiaredžańniem ab tym, što niekatoryja sceny hetaha šedeŭra suśvietnaj multyplikacyi adroźnivajucca «rasavymi zababonami».
Multfilmy režysioraŭ Uiljama Channy i Džozefa Barbiera pra myš i kata, źniatyja bolš za 70 hadoŭ tamu, abvinavačanyja ŭ rasisckich stereatypach, dapuščanych u adlustravańni adnaho ź piersanažaŭ — čarnaskuraj chatniaj prysłužnicy.
Papiaredžańnie kampanii Amazon pakazvaje na toje, što takija zababony ŭ svoj čas byli raspaŭsiudžanyja ŭ amierykanskim hramadstvie.
Tamu sieryi «Tom i Džery» zaraz supravadžajucca jarłykom «etničnyja i rasavyja zababony».
Prafiesar sacyjałohii i kamientatar pa pytańniach kultury Frenk Furedzi nazvaŭ hetuju inicyjatyvu «biazmozhłaj». Pavodle jaho słoŭ, heta prykład falšyvaha maralizatarstva i vid cenzury, jakaja achapiła kulturnaje žyćcio Złučanych Štataŭ.
«My sprabujem mierkavać ab ludziach, jakija žyli ŭ minułym, kirujučysia našymi ciapierašnimi ŭjaŭleńniami», - kaža prafiesar Furedzi.
«Bliskučaja animacyja»
Pieršy film «Tom i Džery» byŭ źniaty ŭ 1940 hodzie na kinastudyi MGM. Z tych časoŭ źniatyja bolš za sto sieryj hetaha multfilma, jaki atrymaŭ siem «Oskaraŭ».
Abvinavačvańni ŭ rasiźmie hučać u adras hetych multfilmaŭ nie ŭpieršyniu. U 1960-ch hadach dla pakazu pa amierykanskim telebačańni navat byli adredahavanyja niekatoryja sieryi.
Vykazvałasia niezadavolenaść i tym, što niekatoryja piersanažy multfilma kurać, paśla čaho byli padkarektavanyja niekatoryja sceny ŭ paźniejšych sieryjach.
Styŭ Abrachart, viadučy kurs lekcyj pa mastactvie animacyi ŭ univiersitecie De Montfor, ličyć jakaść animacyi ŭ sieryi «Tom i Džery» bliskučaj navat pa sučasnych mierkach.
Pavodle jaho słoŭ, studenty, jakija vyvučajuć historyju animacyi, nie ździŭlenyja tym, jak bolš za paŭstahodździa tamu amierykancy stavilisia da pytańniaŭ rasy i etničnaj prynaležnaści. Jany dobra razumiejuć, što heta staŭleńnie źmianiałasia z časam, kaža Styŭ Abrachart.
