Śledčy kamitet Biełarusi ŭ miežach kampietencyi i z vykanańniem pryncypu terytaryjalnaści pravodzić pravierku akaličnaściaŭ, źviazanych z vyjaŭleńniem patronaŭ u aŭtamabili načalnika ŭpraŭleńnia SK pa Minsku pry pierasiačeńni litoŭska-biełaruskaj miažy.
Pra heta paviedamili ŭ Śledčym kamitecie Biełarusi.
Varta zaznačyć, što heta pieršaje aficyjnaje pryznańnie biełaruskich pravaachoŭnych orhanaŭ incydentu z vysokapastaŭlenym čynoŭnikam.
SK paviedamlaje, što 21 vieraśnia načalnik USK pa Minsku Dźmitryj Kanaplanik sa svajoj žonkaj viartaŭsia ź Vilniusa, kudy vyjazdžaŭ vyklučna ŭ turystyčnych metach. Pry pierasiačeńni miažy ŭ litoŭskim punkcie propusku aŭtamabil źviedaŭ pahłybleny nadhlad, u vyniku jakoha pad dniščam mašyny znojdziena karobka z 50 patronami kalibru 9 mm Luger.
Pravaachoŭnymi orhanami Litvy pa hetym fakcie było raspačata rasśledavańnie. U suviazi z hetym Kanaplaniku i jaho žoncy «abmiežavany vyjezd ź Litoŭskaj Respubliki, ich pašparty kanfiskavanyja», paviedamili ŭ SK Biełarusi.
Padčas pravierki, što pravodziłasia Śledčym kamitetam na terytoryi Biełarusi, vyśviatlajucca akaličnaści, jakija papiaredničali vyjezdu Kanaplanika i jaho žonki, praviarajucca viersii ab učynieńni kampramietujučych dziejańniaŭ u dačynieńni da ich z boku trecich asob, u tym liku ŭ suviazi z prafiesijnaj dziejnaściu Kanaplanika z pomsty ci pa inšych matyvach.
Padčas pravierki biełaruskija śledčyja zychodziać z taho, što mytnym orhanam Litvy, mahčyma, pastupiła paviedamleńnie ab najaŭnaści ŭ aŭtamabili Kanaplanika pradmietaŭ kantrabandy, ab čym śviedčyć fakt pahłyblenaha nadhladu aŭtamabila, jaki pravodzicca vielmi redka na vyjeździe ź Litvy.
Taksama, jak zaznačajuć u SK, źviartaje na siabie ŭvahu fakt spracoŭvańnia ŭ načny čas sihnalizacyi aŭtamabila, jaki znachodziŭsia na stajancy kala hatela padčas znachodžańnia Kanaplanika ŭ Litvie.
Biełaruskija śledčyja praviali ahlad anałahičnaha aŭtamabila, u vyniku čaho ŭstanoŭlena, što, zychodziačy ź jaho bazavych kanstruktyŭnych asablivaściaŭ, tajnaje raźmiaščeńnie pradmieta, anałahičnaha znojdzienamu ŭ aŭtamabili Kanaplanika, pad dniščam aŭtamabila nie ŭjaŭlaje ciažkaściaŭ i moža być zroblena biez uskryćcia sałona za vielmi karotki čas (da 1 chviliny).
Sam Kanaplanik palaŭničym nie źjaŭlajecca, zbrojaj nie zachaplajecca. U Litvie znajomych nie maje, vyjazdžaŭ tudy ŭpieršyniu. Prahrama znachodžańnia ŭ Vilniusie źjaŭlałasia siamiejnym adpačynkam i ŭklučała naviedvańnie historyka-kulturnych abjektaŭ, zaznačajuć u SK Biełarusi.
Da stvareńnia Śledčaha kamiteta Kanaplanik prachodziŭ słužbu ŭ orhanach dziaržaŭnaj biaśpieki. U Śledčym kamitecie da vieraśnia 2013 hoda zajmaŭ pasadu načalnika hałoŭnaha ŭpraŭleńnia pa rasśledavańni złačynstvaŭ u śfiery arhanizavanaj złačynnaści i karupcyi. Mienavita heta padraździaleńnie zajmajecca rasśledavańniem samych ciažkich i rezanansnych kryminalnych spraŭ u dačynieńni da kiraŭnikoŭ i ŭdzielnikaŭ złačynnych arhanizacyj, arhanizavanych hrup, u tym liku transnacyjanalnych, a taksama złačynstvaŭ ab karupcyi, jašče raz zaznačajuć u SK.
«Aceńvajučy ŭ sukupnaści źviestki, što majucca ŭ rasparadžeńni śledstva, biełaruskija śledčyja miarkujuć, što asnoŭnaj viersijaj źjaŭlajecca ŭčynieńnie nieŭstanoŭlenymi asobami ŭ dačynieńni da Kanaplanika dziejańniaŭ kampramietujučaha charaktaru, jakija prajavilisia ŭ zakładcy patronaŭ u aŭtamabil. Kamu i navošta heta było patrebna, i treba budzie vyśvietlić sumiesnymi namahańniami biełaruskich i litoŭskich pravaachoŭnikaŭ», — miarkujuć u SK.
Śledčy kamitet Biełarusi vykazvaje hatoŭnaść akazać usiebakovuju dapamohu i sadziejničańnie litoŭskim kaleham u vyśviatleńni akaličnaściaŭ incydentu.
