Mižnarodnaje supracoŭnictva biełaruskich pravaachoŭnych orhanaŭ z zamiežnymi kalehami pa procidziejańni sieksualnamu nasillu dziaciej «sapsavała» sieks-tur u Biełaruś hramadzianina Vialikabrytanii.
Ab hetym na pres-kanfierencyi 6 kastryčnika paviedamiŭ načalnik adździeła pa procidziejańni miždziaržaŭnamu handlu ludźmi ŭpraŭleńnia pa narkakantroli i procidziejańni handlu ludźmi MUS Dźmitryj Cajun.
«Kalehi ź Vialikabrytanii svoječasova prainfarmavali nas ab pryjeździe ŭ našu krainu ich hramadzianina, raniej sudzimaha za sieksualnyja złačynstvy ŭ dačynieńni da dziaciej. Pieradadzienaja nam infarmacyja, usie abmiežavalnyja miery pry znosinach hetaha hramadzianina ź niepaŭnaletnimi dazvolili nam nie dapuścić učynieńnia hvałtoŭnych dziejańniaŭ sieksualnaha charaktaru ŭ dačynieńni da dziaciej na terytoryi Biełarusi», — kanstatavaŭ pradstaŭnik MUS.
Hety prykład, pavodle jaho słoŭ, havoryć ab tym, što mahčymaść učynieńnia nasilla nad dziećmi nie viedaje miežaŭ, nosić mižnarodny charaktar, ujaŭlaje saboj vyklik dla pravaachoŭnych orhanaŭ usich krain.
Jak adznačyŭ Dźmitryj Cajun, vyjaŭleńnie złačynstvaŭ u dačynieńni da niepaŭnaletnich źviazana z peŭnymii ciažkaściami. Heta, u pryvatnaści, učynieńnie złačynstvaŭ va ŭmovach nievidavočnaści. Pavodle słoŭ śpiecyjalista, časta ŭsia praca pa vyjaŭleńni takich złačynstvaŭ budujecca na atrymańni infarmacyi asabistym vyšukam apieratyŭnikaŭ. Vielmi redkija vypadki zvarotu ŭ milicyju z zajavaj trecich asob — baćkoŭ, znajomych, vypadkovych ludziej, jakim niejkim čynam stali viadomyja akaličnaści ŭčynieńnia ŭ adnosinach da dziaciej złačynstvaŭ.
Pradstaŭnik MUS nazvaŭ niekalki mižnarodnych dakumientaŭ, jakija vykarystoŭvaje Biełaruś u procidziejańni sieksualnamu nasillu nad dziećmi, i sa škadavańniem vykazaŭsia ab tym, što kraina pakul nie dałučyłasia da dźviuch kanviencyj Savieta Jeŭropy, «choć stanoŭčaje rašeńnie hetaha pytańnia moža stać važnym krokam dla bolš efiektyŭnaha mižnarodnaha ŭzajemadziejańnia i baraćby ź piedafiłami i raspaŭsiudžvalnikami dziciačaj parnahrafii».
