Siońnia ŭ Biełaruskim PEN-centry adbyŭsia kruhły stoł, pryśviečany Tydniu suprać śmiarotnaha pakarańnia ŭ Biełarusi.
Aleś Bialacki i Kareł Švarcenbierh.
Udzieł u kruhłym stale ŭziali biełaruskija litaratary Barys Piatrovič, Andrej Chadanovič, Uładzimir Arłoŭ, pravaabaronca Aleś Bialacki, staršynia Kamiteta pa zamiežnych spravach Parłamienta Češskaj Respubliki, były ministr zamiežnych spraŭ Kareł Švarcenbierh, pasoł Čechii ŭ Biełarusi Miłan Ekiert, pasoł Bałharyi Ivajła Ivanaŭ, pasoł Vialikabrytanii Brus Bakneł, apostalski nuncyj Kłaŭdzia Hudžeroci.
Usie ŭdzielniki pahadzilisia, što isnavańnie ŭ Biełarusi śmiarotnaha pakarańnia źjaŭlajecca absalutna nieprymalnym.
Adnak adna z hałoŭnych linij dyskusii razharnułasia vakoł mahčymych instrumientaŭ admieny śmiarotnaha pakarańnia. Tak, jeŭrapiejskija dypłamaty kazali pra pieraacenku roli pradstaŭnikami Biełarusi roli ŭsienarodnaha refierendumu.
Niekatoryja ź ich nahadali, što mierkavańniem hramadstva lohka manipulavać, prosta ŭzhadaŭšy hučnyja žortskija złačynstvy.
Miłan Ekiert.
«Prablemy śmiarotnaha pakarańnia adnosiacca da taho typu prablem, dzie palityki musiać bačyć dalej za zvyčajnych hramadzian.
U Čechii admiena śmiarotnaha pakarańnia adbyłasia nie praz usienarodny refierendum, ale praz namahańni humanistyčna nastrojenych asob, takich, jak Vacłaŭ Havał», — skazaŭ Miłan Ekiert.
Ivajła Ivanaŭ.
Ivajła Ivanaŭ nahadaŭ prykłady Francyi, dzie hramadzianie na refierendumie vykazalisia za zachavańnie śmiarotnaha pakarańnia, adnak parłamient i prezident admianili vyšejšuju mieru.
Brus Bakneł.
Pasoł Bakneł taksama zasiarodziŭ uvaho na tym, što ŭ Vialikabrytanii padčas admieny śmiarotnaha pakarańnia bolšaść žycharoŭ vystupała za jaho zachavańnie. Navat ciapier 45% ludziej starejšaha pakaleńnia krainy vystupaje za vyšejšuju mieru pakarańnia. Adnak siarod maładych ludziej 18-24 hadoŭ hetaja ličba našmat mienšaja.
Bakneł taksama paviedamiŭ, minułahodni uzrovień naŭmysnych zabojstvaŭ i hvałtu ŭ Vielikabrytanii byŭ samym nizkim za apošnija 30 hadoŭ, i heta pry adsutnaści ŭ krainie śmiarotnaha pakarańnia. Bakneł kaža, što hetaha ŭdałosia dasiahnuć z dapamohaj jak dobraj pracy pravaachoŭnych struktur i rańniaha pajaredžvańnia złačynstvaŭ, tak i z dapamohaj hłybokaha i roznabakovaha vychavańnia ŭ hramadstvie ciarpimaści.
