U adzinaj raźlikovaj i infarmacyjnaj prastory Respubliki Biełaruś (ARIP) z 2 kastryčnika pačaŭ funkcyjanavać adziny dla ŭsich bankaŭ miechanizm raźlikaŭ pa płaciažach, pryniatych u ramkach ARIP, paviedamili va ŭpraŭleńni infarmacyi i hramadskich suviaziaŭ Nacyjanalnaha banka.
Realizacyja adzinaha miechanizmu raźlikaŭ pa płaciažach ARIP była praduhledžana pastanovaj № 393 praŭleńnia Nacbanka ad 10 červienia 2014 hoda.
«Ukazany miechanizm hruntujecca na ŭžyvańni ałharytmu kłasičnaj klirynhavaj sistemy, jakaja praduhledžvaje praviadzieńnie ŭzajemazaliku sustrečnych patrabavańniaŭ bankaŭ. Naprykład, pieršy bank pryniaŭ płaciažy na karyść arhanizacyi, jakaja maje rachunak u druhim banku. U svaju čarhu, druhi bank pryniaŭ płaciažy na karyść inšaj arhanizacyi, u jakoj rachunak adkryty ŭ pieršym banku. Hetyja płaciažy mohuć jak poŭnaściu, tak i častkova pierakryvać adzin adnaho. Klirynhavaja častka AIS «Raźlik» vyličvaje čystyja pazicyi kožnaha banka. Pazicyja banka moža być jak kredytavaj (kali bank pavinien atrymać hrošy na karyść svaich klijentaŭ), tak i debietavaj (kali bank pavinien pieraličyć hrošy na karyść klijentaŭ inšych bankaŭ)», — rastłumačyli ŭ Nacbanku.
Štodnia z pačatku zapusku klirynhavaja častka AIS «Raźlik» u siarednim apracoŭvaje bolš za 9 tysiač rejestraŭ ad bankaŭ. Tak, za 2, 3 i 6 kastryčnika AIS «Raźlik» apracavana 28.282 rejestry na ahulnuju sumu kala 174,2 młrd. biełaruskich rubloŭ. Bolš za 40 pracentaŭ apracavanych u klirynhu AIS «Raźlik» rejestraŭ prychodziać ad AAT «AAB Biełarusbank» i AAT «Biełahraprambank».
«Realizacyja klirynhavaj častki AIS «Raźlik» dazvolić nie tolki ŭ peŭnaj stupieni źnizić raschody bankaŭ na praviadzieńnie płaciažoŭ u ARIP, ale i pavysić prazrystaść ažyćciaŭleńnia raźlikaŭ pa roźničnych płaciažach pry dapamozie AIS «Raźlik», — ličać u Nacbanku.
