Sud Homielskaha rajona 6 kastryčnika daŭ žycharu adnoj ź viosak štraf u pamiery 12 młn rubloŭ (80 bazavych vieličyń) za iłžyvaje paviedamleńnie ab niebiaśpiecy (artykuł 340 KK).
Jak paviedamiŭ vykanaŭca abaviazkaŭ pamočnika prakurora Homielskaha rajona Raman Kamiankoŭ, viaskoviec 1965 naradžeńnia «zaminiravaŭ» kałodziež, sprabujučy takim čynam pryciahnuć uvahu ŭładaŭ da prablemy krynic vady ŭ vioscy.
22 lipienia žychar vioski znachodziŭsia ŭ stanie ałkaholnaha apjanieńnia. Jon ubačyŭ, što kamunalnyja słužby ramantujuć adzin z kałodziežaŭ, i pacikaviŭsia: kali ž čarha dojdzie da jaho studni? Rabočyja adkazali, što nikoli: tolki try studni buduć adramantavanyja, a astatnija - demantavanyja, to bok zasypanyja, bo jany nieprydatnyja.
Viaskoviec źniervavaŭsia, pieražyvajučy za svaju maci-invalida, jakoj pryjdziecca daloka chadzić za vadoj, i patelefanavaŭ u sielski saviet. Tam, vierahodna, jaho skarhu nie zadavolili, i jon patelefanavaŭ u rajvykankam. U instancyi paraili vyrašać prablemu na miescy.
Tady mužčyna patelefanavaŭ pa 101 i paviedamiŭ, što studnia zaminiravanaja. Pryčym nazvaŭ svajo proźvišča i adras. Sam ža sieŭ la kałodzieža ŭ čakańni prybyćcia śpiecyjalnych słužbaŭ — hrupy raźminiravańnia, milicyi i vyratavalnikaŭ. Na miescy supracoŭnikam roznych orhanaŭ viaskoviec patłumačyŭ svaju prablemu.
X
