fota z sajta sk.gov.by
U stalicy ad užyvańnia «spajsaŭ» zahinuli jašče dva maładyja čałavieki. Upraŭleńniem Śledčaha kamiteta pa Minsku vyśviatlajucca abstaviny śmierci dvuch maładych ludziej, jak miarkujecca źviazanych ź pieradaziroŭkaj psichatropnymi rečyvami, paviedamlajecca na sajcie Śledčaha kamiteta.
Śledča-apieratyŭnaja hrupa pracuje na miescy zdareńnia — u adnym ź internataŭ u Kastryčnickim rajonie stalicy. Ranicaj 19-hadovy chłopiec pabačyŭ, što dvoje jaho susiedziaŭ pa pakoi nie padajuć prykmiet žyćcia.
Miedrabotniki, što pryjechali na miesca zdareńnia, kanstatavali śmierć maładych ludziej 1995 i 1992 h.n., jakija byli rabočymi vytvorčych pradpryjemstvaŭ horada.
U chodzie pieršapačatkovych śledčych dziejańniaŭ ustanoŭlena, što napiaredadni viečaram chłopcy praź Internet nabyli ŭ nieŭstalavanaj asoby kurylnuju sumieś. Zabraŭšy «spajs» z tajnika ŭ inšym rajonie, pryvieźli jaho ŭ internat, dzie i ŭžyli.
Kastryčnickim (h. Minska) rajonnym adździełam Śledčaha kamiteta raspačata kryminalnaja sprava pa prykmietach złačynstvaŭ, praduhledžanych č. 2 art. 144 (pryčynieńnie śmierci pa nieaściarožnaści dvum asobam) i č. 3 art. 328 (niezakonny abarot asabliva niebiaśpiečnych psichatropnych rečyvaŭ) Kryminalnaha kodeksa Respubliki Biełaruś.
Va ŭzajemadziejańni z orhanami ŭnutranych spraŭ pravodziacca nieadkładnyja śledčyja dziejańni i apieratyŭna-vyšukovyja mierapryjemstvy. Pa ŭziatych ź miesca zdareńnia rečyŭnych dokazach pryznačany ekśpiertyzy, paviedamlaje pres-słužba SK.
Akramia taho, Hałoŭnym śledčym upraŭleńniem praciahvajecca aktyŭnaja praca pa rasśledavańni kryminalnych spraŭ, źviazanych z papiarednimi faktami śmierciaŭ maładych ludziej ad užyvańnia psichatropnych rečyvaŭ. Zatrymany šerah zbytčykaŭ, jakija zaraz dajuć pakazańni.
Źviartajecca ŭvaha, što ŭ maładziožnym asiarodździ praciahvajecca papularyzacyja kurylnych sumiesiaŭ (tak zvanych «spajsaŭ», «miksaŭ», «marak») jak srodkaŭ rassłableńnia i atrymańnia zadavalnieńnia.
Pry hetym jany pazicyjanujucca jak całkam lehalnyja i biasškodnyja dla zdaroŭja čałavieka. Adnak śmierci 11 maładych ludziej, što pavieryli ŭ heta, kažuć pra advarotnaje — heta niebiaśpiečnyja rečyvy, jakija zdolnyja pryvieści da niepapraŭnych nastupstvaŭ — ad parušeńniaŭ centralnaj niervovaj sistemy, zvarjacieńnia da śmiarotnaha vyniku, padkreślivaje pres-słužba Śledčaha kamiteta.
