Makiet biłborda sacyjalnaj rekłamy baranavickaha futbolnaha kłuba nie prajšoŭ uzhadnieńnie ŭ Mižviedamasnym saviecie pa rekłamie pry ŭpraŭleńni handlu i pasłuh Minharvykankama. Farmuloŭka čynoŭnikaŭ — «vykarystańnie fašysckaj simvoliki».
Rabotnikam Savieta nie spadabałasia, što bramnik Dźmitryj Tarasievič staić na fota z padniataj rukoj. Jaho žest byŭ rascenieny čynoŭnikami jak fašysckaje pryvitańnie. Na samaj spravie hałkipier baranavickaj kamandy jak by pakazvaje kamandzie kirunak «Napierad!», što padmacoŭvajecca łozunham, raźmieščanych pobač: «Nie važna, chto nasuprać, važniej, chto pobač!».
Da taho ž čynoŭniki paličyli tvary futbalistaŭ, pradstaŭlenyja na fota, «zanadta ahresiŭnymi», — paviedamiła supracoŭnica rekłamnaha ahienctva «Biełźniešrekłama», jakoje zajmajecca vyrabam rekłamy dla kłuba.
Futbalisty baranavickaha kłuba z humaram pastavilisia da situacyi.
«Futbolny kłub «Baranavičy» prapahanduje sport, zdarovy ład žyćcia, i pry stvareńni dadzienaha makieta my nijak nie mieli na ŭvazie, što padobnyja žesty mohuć być rascenienyja jak radykalnyja. Nivodzin hulec u kłubie nie padtrymlivaje radykalnych pohladaŭ, navat pry stvareńni hetaha prajekta my ni razu nie čuli z boku, što heta moža być rasceniena niejak dvajaka», — paviedamiła pres-słužba kłuba.
