Prezident Ukrainy Piatro Parašenka paćvierdziŭ, što sustreniecca z rasijskim lidaram Uładzimiram Pucinym u Miłanie na nastupnym tydni.
«U mianie budzie sustreča z prezidentam Rasii Uładzimiram Pucinym u Miłanie», — skazaŭ na bryfinhu ŭ Charkavie ukrainski prezident.
Pavodle jaho słoŭ, hałoŭnaje pytańnie pieramovaŭ u Miłanie — mir. «Klučavoje i hałoŭnaje pytańnie — heta mir. Rolu RF u pytańni miru, jak vy razumiejecie, pieraacanić składana. I siońnia my stavim pytańnie pierachodu ad zajavaŭ da kankretnych krokaŭ», — skazaŭ Parašenka.
Pavodle słoŭ ukrainskaha prezidenta, ciapier na ŭschodzie Ukrainy dźvie hałoŭnyja zadačy - mir i zakryćcio miažy z Rasijaj.
U Miłanie 16-17 kastryčnika projdzie samit ASIEM.
Taksama Parašenka zajaviŭ, što Ukraina i Rasija blizkija da vyrašeńnia hazavaha pytańnia.
«My zaraz vielmi blizkija da taho, kab urehulavać pytańnie hazavaj sprečki z Rasijskaj Fiederacyjaj. Ja spadziajusia, što značny prahres budzie prademanstravany 17 kastryčnika ŭ Miłanie», — skazaŭ kiraŭnik Ukrainy, adkazvajučy na pytańni žurnalistaŭ.
Parašenka adznačyŭ, što pytańnie hazavaj biaśpieki budzie abmiarkoŭvać razam z pytańniami Mirnaha płana i vykanańniem Minskich damoŭlenaściej.
«My ličym, što prapanovy Ukrainy vyraznyja i hruntoŭnyja. My ŭpeŭnienyja ŭ tym, što my nablizilisia da vyrašeńnia hetaha pytańnia», — skazaŭ Parašenka.
U toj ža čas prezident nazvaŭ prablemnym zabieśpiačeńnie hazam akupavanych terytoryj. «Najaŭnyja hrošy tam u ludziej źbirajucca, a Ukrainie nie pieradajucca. Taksama vostra staić pytańnie zabieśpiačeńnia elektraenierhijaj, vuhlom. Pytańni enierhietyki i miru źjaŭlajucca vielmi ŭzajemazłučanymi», — padkreśliŭ Parašenka.
