Z-za prybyćcia ŭ Sierbiju ź vizitam rasijskaha prezidenta Uładzimira Pucina dzień vyzvaleńnia Biełhrada buduć adznačać na čatyry dni raniej za histaryčnuju datu.
Z-za taho, što Pucin pažadaŭ pryniać udzieł u śviatkavańni, dzień vyzvaleńnia Białhrada buduć adznačać 16-ha kastryčnika zamiest 20-ha. U honar Pucina taksama ŭpieršyniu za amal 30 hadoŭ ładziać vajenny parad.
Takoha nie było navat u časy prezidenctva Iosipa Broza Cita, adznačaje Nikoła Tomič, redaktar biełhradskaj haziety «Blic».
«Ułada ŭ Białhradzie vyrašyła prystasavać datu dziaržaŭnaha śviata da paradku dnia Pucina. Na moj pohlad, heta krasamoŭna śviedčyć pra toje, što ŭłady ŭ Białhradzie vielmi hnutka staviacca navat da suvierenitetu krainy. Usio zaležyć ad taho, što im na dadzieny momant treba», — kaža Tomič.
U honar Pucina ŭ Sierbii ŭpieršyniu z 1985 hoda ładziać vajenny parad. U im voźmuć udzieł prykładna try tysiačy sałdat — piachota, artyleryja, tankisty, avijacyja, navat dunajskija vajennyja karabli, dakładniej — łodki. Da sierbskich piłotaŭ dałučycca i rasijskaja vajennaja hrupa «Stryžy».
Na dumku ahladalnikaŭ, vizit Pucina i ŭsio ź im źviazanaje patrebny nie tak Sierbii, jak Rasii i jaje prapahandystam. Jany imknucca pakazać, što Rasija maje siabroŭ za miažoj i što jana hraje važnuju rolu na Bałkanach.
Pry hetym u Sierbii na praciahu niekalkich minułych hadoŭ naohuł nie adznačali dat vyzvaleńnia, pakolki va ŭładzie znachodziacca pravacentrysty, jakija nie pavažajuć rolu partyzanskaj armii, jakuju ŭznačalvaŭ hiensiek kampartyi Iosip Broz Cita.
U toj ža čas Saviecki Sajuz u svoj čas pryznavaŭ tolki partyzanski ruch i supracoŭničaŭ tolki ź im.
Vizit Pucina ŭ Białhrad praciahniecca tolki adzin dzień — 16 kastryčnika. Na śviatkavańnie nie zaprasili prezidentaŭ inšych krain, sałdaty jakich vajavali ŭ šerahach Čyrvonaj armii (Białhrad vyzvalali bajcy Druhoha ŭkrainskaha frontu).
