Stvaralnica adukacyjnych kursaŭ «Mova ci kava», žurnalistka rasijskaha Pieršaha telekanała Kaciaryna Kibalčyč u svaim fejsbuku ŭstupiła ŭ zavočnuju palemiku z šef-redaktaram sajta by.tribuna.com Maksimam Bierazinskim.
Kaciaryna Kibalčyč. Fota kyky.org.
Paśla čaćviarhovaj sustrečy nacyjanalnych zbornych Biełarusi i Ukrainy Bierazinski napisaŭ tekst «Voiny, śvieta». Voś adzin z momantaŭ, jakija aburyli Kibalčyč:
«Ukraincy pryjechali ŭ Biełaruś i pryvieźli z saboj toj duch svabody, jakim u ich prasiaknuta ŭsio. Kali idzieš pa pierakrytym Chryščaciku, a tam pad kožnym lichtarom śpiavajuć pieśni pad hitaru ci navat ź minimalnymi kałonkami, pieršaja dumka: a dzie padzieŭsia AMAP?»
Voś što na heta adkazała Kibalčyč:
«Ukrainski AMAP sapraŭdy ŭ apošni čas «padzieŭsia». Dzie heta jon, kali chłopcy ŭ bałakłavach atačajuć ofis telekampanii ŭ Kijevie, zdymajuć trusy z kandydata ŭ prezidenty i biehajuć ź imi, jak ź ściaham, pa Majdanie, kali jany źbivajuć inšadumcaŭ, spalvajuć žyŭcom ludziej u budynku, hromiać ambasadu?»
«Paśla «spalenych žyŭcom ludziej» možna było nie čytać. Bratazabojčaja vajna i biedny kandydat u prezidenty … Dla poŭnaha naboru ŭkryžavanaha dziciaci i hrošaj dziarždepa nie chapaje. Kacia, a jak tam «žurnalistka» [vašaha kanała] pažyvaje, jakaja dzicia ŭ Słaviansku «ŭkryžavała»? i jašče pytańniečka: a chto zbroju i bajevikoŭ na Danbas pastaŭlaje dla «bratazabojčaj vajny»?» — nie vytrymaŭ apieratar «Biełsata» Alaksandr Barazienka.
«Možna harłapanić i atrymlivać ad hetaha kajf. Možna trochi rassłabicca i nie čakać, kali humavaja dubinka udaryć ciabie pa hałavie. Było vidać i čuvać, što biełarusy vielmi doŭha ciarpieli, vielmi doŭha maŭčali», — heta znoŭ uryvak z artykuła Maksima Bierazinskaha.
«Heta voś vielmi važny artykuł, dzie naiŭny čałaviek ščyra nazyvaje rečy svaimi imionami. Kajf — heta klučavoje słova majdanu. Tolki im možna rastłumačyć masavaje varjactva adukavanych ludziej, jakija aślepli na adno voka, dakładniej vykałali jaho sabie dobraachvotna. Tolki pad kajfam možna zachaplacca «voinami śviatła», jakija na tankach niasuć jeŭrapiejskija kaštoŭnaści «ciomnym nieadukavanym» masam ŭ Danbasie, nie ličačy ich navat ludźmi, a tolki kazurkami», — adkazała Kibalčyč.
Charakterna, što ŭ kamientach da pasta adznačyŭsia rasijski piśmieńnik Zachar Prylepin, jaki na dniach prapanoŭvaŭ układvać u Biełaruś hranty, kab jana nie pierastała być častkaj «ruskaha śvietu». «Vielmi dobra, dziakuj!» — nie chavaŭ zadavalnieńnia Prylepin.
Biełarusy ŭ kamientarach u cełym niehatyŭna adreahavali na słovy Kibalčyč. Varta adznačyć, što ŭ padobnaj stylistycy byli vykananyja repartažy Kaciaryny Kibalčyč z Ukrainy sioleta. Dziela hetaha možna pahartać archiŭ Pieršaha telekanała.
«Ja nie brała ŭdziełu ŭ rasijskich vybarach, ale kali b viedała, što ad majho hołasu zaležyć vynik i pajšła hałasavać, z usich kandydataŭ abrała b Pucina, choć ja i nie jahony fanat», — kazała Kaciaryna ŭ intervju «Našaj Nivie» ŭ lutym 2013 hoda.
Varta adznačyć, što Kibalčyč aŭtarka filma pra Płošču-2010 «Biełaruskaja mara», a taksama inicyjatarka stvareńnia adukacyjnych kursaŭ «Mova ci kava».
Darečy, viadučyja «Movy ci kavy» Franak Viačorka i Valaryna Kustava admiežavalisia ad słovaŭ Kibalčyč.
«Zajavy Kaci Kibalčyč pra ŭkrainskija padziei nie majuć ničoha supolnaha ź mienskimi kursami «Mova ci kava». Asabista mnie jaje pazicyja čužaja i ahidnaja», — napisaŭ Viačorka.
