Najbujniejšy bank Hiermanii prahnazuje, što praz try hady jeŭra budzie kaštavać 0,95 dołara, a Jeŭropa sutykniecca z najmahutnym adtokam kapitału ŭ historyi suśvietnych finansavych rynkaŭ.
Da kanca 2017 kurs jeŭra da dołara moža ŭpieršyniu za bolš čym dziesiać hadoŭ upaści nižej za parytet i skłaści 0,95 dołara ZŠA. Taki prahnoz na dniach apublikavaŭ niamiecki Deutsche Bank.
U tym, što ŭ bližejšyja dva hady jeŭra praciahnie padać u dačynieńni da dołara, sychodziacca ŭsie aŭtarytetnyja jeŭrapiejskija i amierykanskija banki. Adnak prahnoz najbujniejšaha banka Hiermanii na siońniašni dzień samy piesimistyčny ź pierš ahučanych.
Analityki brytanskaha banka HSBC bolš aptymistyčnyja, pradkazvajučy 1,19 dołara za jeŭra da kanca 2015 hoda. Ich kalehi z Barclays ličać, što kurs źnizicca da 1,10. Amierykancy z Morgan Stanley pradrakajuć 1,14 dołara za jeŭra ŭ 2015 hodzie. Najbolš ža blizki da mierkavańnia Deutsche Bank prahnoz ekśpiertaŭ Goldman Sachs, jakija ličać, što da zimy 2017 abiedźvie valuty dasiahnuć parytetu.
Nahadajem, što z pačatku hoda jeŭra straciŭ pa adnosinach da dołara kala 6,5%. Maksimum kursu naziraŭsia ŭ mai, kali za jeŭrapiejskuju valutu davali 1,3953 amierykanskaj, a minimum byŭ dasiahnuty na hetym tydni, 6 kastryčnika, skłaŭšy 1,2763 dołara.
Papiaredniaje padzieńnie kursu jeŭra adbyłosia ŭ 2000 hodzie. Tady byŭ dasiahnuty histaryčny minimum u 0,83 dołara. Analityk Deutsche Bank Džordž Saraviełas, jaki apublikavaŭ prahnoz, ličyć, što ciapierašniaja situacyja abumoŭlena ekanamičnymi pryčynami.
Na dumku ekśpierta, kurs padaje ŭ pieršuju čarhu tamu, što ŭ ES jość lišak hrašovaj masy, praficyt handlovaha bałansu na sumu 400 młrd dołaraŭ, i nadzvyčaj nizkaja kredytnaja staŭka, jakuju padtrymlivaje Jeŭrapiejski Centrabank — 0,05% dla kredytavańnia kamiercyjnych bankaŭ.
