Alaksandr Łukašenka ŭnios źmianieńni i dapaŭnieńni ŭ svoj ukaz № 551 ad 28 listapada 2005 hoda «Ab mierach pa pavyšeńni biaśpieki darožnaha ruchu», paviedamlaje pres-słužba prezidenta.
Novym ukazam, № 483, z 40 da 50 hadzin pavialičvajecca čas navučańnia praktyčnamu kiravańniu aŭtamabilem pry padrychtoŭcy kiroŭcaŭ miechaničnych transpartnych srodkaŭ katehoryi V. Pry hetym aŭtaškołam dajecca čatyrochmiesiačny termin dla arhanizacyi padrychtoŭki kiroŭcaŭ u adpaviednaści z novymi patrabavańniami.
Praduhledžvajecca abaviazkovaje vykarystańnie z 1 śniežnia pa 1 sakavika zimovych šyn na aŭtamabilach z technična dapuščalnaj ahulnaj masaj da 3,5 t, lehkavych i hruzapasažyrskich aŭtamabilach masaj bolš za 3,5 t, a taksama aŭtobusach masaj da 5 t.
Ustanaŭlivajecca taksama abaviazak pieravozki dziaciej da 12 hadoŭ u lehkavym aŭtamabili z vykarystańniem dziciačych utrymalnych prystasavańniaŭ ci inšych srodkaŭ, jakija dazvalajuć biaśpiečna pryšpilić dzicia pry dapamozie ramianioŭ biaśpieki (akramia vypadkaŭ, kali rost dziciaci pieravyšaje 150 sm, a taksama pry pieravozcy ŭ aŭtamabili-taksi).
Źmianiajecca minimalnaja stupień prapuskańnia śviatła dla vietravoha škła transpartnaha srodku, pry jakoj dapuskajecca jaho ŭdzieł u darožnym ruchu, z 75 da 70%.
Da elemientaŭ darohi adniesieny raźmieščanyja na prajeznaj častcy darohi pasadačnyja placoŭki i astraŭki biaśpieki, što dazvolić raspaŭsiudzić abaviazak uładalnikaŭ daroh pa ŭtrymańni elemientaŭ daroh u biaśpiečnym dla ruchu stanie na ŭkazanyja zbudavańni.
Akramia taho, uvodziacca novyja vidy darožnaj raźmietki dla arhanizacyi ruchu viełasipiedaŭ, a taksama dla abaznačeńnia kirunkaŭ ruchu pa pałosach na skryžavańniach sa składanaj kanfihuracyjaj.
Ukaz nabyvaje moc praz try miesiacy paśla jaho aficyjnaha apublikavańnia.
Jak adznačaje pres-słužba, dakumient skiravany na pavyšeńnie biaśpieki darožnaha ruchu i ŭdaskanaleńnie pravił darožnaha ruchu z ulikam praktyki ich prymianieńnia.
