Biełarusy ličać adnoj z hałoŭnych pahroz dla krainy stratu biełaruskaj movy, śviedčać vyniki lipieńskaha apytańnia Instytuta sacyjałohii Nacyjanalnaj akademii navuk, jakija ŭpieršyniu ahučyŭ pamočnik prezidenta pa ekanamičnych pytańniach Kirył Rudy na sustrečy 16 kastryčnika sa studenckim aktyvam Biełaruskaha dziaržaŭnaha ŭniviersiteta.
Padčas sacyjałahičnaha apytańnia, paviedamiŭ jon, respandentam prapanoŭvałasia adkazać na pytańnie, jakija doŭhaterminovyja dla krainy pahrozy (da 2030 hoda) jany bačać.
«Pahroza numar adzin — pamianšeńnie nasielnictva z-za nizkaj naradžalnaści, adkazali 37% apytanych. Na druhim miescy — strata biełaruskaj movy, na trecim — pjanstva i ałkahalizm, na čaćviortym — napłyŭ mihrantaŭ ź inšych krain, na piatym — ekałahičnyja prablemy, na šostym — źnižeńnie ŭzroŭniu žyćcia», — kanstatavaŭ Kirył Rudy.
Chaciełasia b, adznačyŭ jon, daviedacca mierkavańnie nasielnictva ab tym, jakoj jano bačyć nacyjanalnuju ekanomiku ŭ budučyni. Razam z tym padčas sacyjałahičnaha apytańnia ŭ respandentaŭ zapytali ab staŭleńni da ciapierašniaj ekanamičnaj situacyi ŭ krainie.
«30% acanili jaje jak stanoŭčuju, 30% — jak admoŭnuju, a 30% naohuł nie razumiejuć, što adbyvajecca ŭ ekanomicy», — kanstatavaŭ Kirył Rudy.
Padčas sacyjałahičnaha apytańnia, paviedamiŭ pamočnik prezidenta, u biełarusaŭ cikavilisia taksama, u jakich intehracyjnych abjadnańniach varta ŭdzielničać krainie. «30% padtrymlivajuć členstva krainy ŭ Jeŭrazijskim ekanamičnym sajuzie, 20% vystupajuć za niejtralitet, 10% — za členstva Biełarusi ŭ Jeŭrasajuzie», — kanstatavaŭ Kirył Rudy.
Pavodle jaho słoŭ, asnoŭnyja pieravahi Biełarusi ad udziełu ŭ Jeŭrazijskim ekanamičnym sajuzie biełarusy bačać u tym, što hetaje intehracyjnaje abjadnańnie zabiaśpiečvaje rynak zbytu dla biełaruskich tavaraŭ, finansavuju dapamohu z boku Rasii, atrymańnie tannych enierhanośbitaŭ.
«U jakaści pahroz udzielniki apytańnia nazvali adtok kvalifikavanych kadraŭ u Rasiju, źnižeńnie kankurentazdolnaści tavaraŭ, pavyšeńnie mytaŭ», — skazaŭ Kirył Rudy. Razam z tym, dadaŭ jon, 75% padtrymlivajuć sacyjalna-ekanamičnuju intehracyju z Rasijaj i tolki 9,7% apytanych vykazalisia suprać.
