Siły samaabvieščanaj «Danieckaj narodnaj respubliki» spyniać ahoń i adyduć ad linii raźmiežavańnia, kali Rasija stanie harantam mirnaha pracesu na ŭschodzie Ukrainy. Pra heta ŭ piatnicu, 17 kastryčnika, zajaviŭ «Interfaksu» vice-premjer «DNR» Andrej Purhin.
«Biezumoŭna, kali Rasija vystupić harantam biaśpieki ŭ rehijonie, my hatovyja spynić ahoń i advieści ŭzbrajeńni ad linii sudakranańnia», - skazaŭ jon.
Pa słovach Purhina, ciapier pradstaŭniki ABSIE nie mohuć u naležnaj miery sačyć za vykanańniem režymu pieramirja, bo ŭ ich «tolki mandat naziralnikaŭ, a nie kantraloraŭ».
Jon taksama paprasiŭ Rasiju pierakanać Ukrainu pačać raźminiravańnie terytoryi, dzie išli bai.
Ukrainski bok i sieparatysty, pa słovach vice-premjera «DNR», ŭzhadnili kala 75% linii raźmiežavańnia. Tam, dzie linija ŭzhodniena, bai nie viaducca, u inšych miescach «bajesutyčki zdarajucca».
Padpisany ŭ Minsku miemarandum praduhledžvaje stvareńnie bufiernaj zony. Jana farmujecca na asnovie linii sudakranańnia bakoŭ pa stanie na 19 vieraśnia, ad hetaj linii adkładajecca nie mienš za 15 kiłamietraŭ z kožnaha boku. Adtul pavinna być vyviedziena ciažkaje ŭzbrajeńnie.