Siońnia Alaksandr Łukašenka zrabiŭ čarhovaje kadravaje pryznačeńnie. Kiraŭnikom słužby achovy kiraŭnika dziaržavy pryznačany Viktar Šynkievič. Jon źmianiŭ na hetaj pasadzie Andreja Uciuryna, jakoha ŭ pačatku vieraśni adpravili na pavyšeńnie namieśnikam dziaržsakratara Rady biaśpieki.
Viktaru Šynkieviču 54 hady. Jon naradziŭsia ŭ vioscy Kromavičy Dokšyckaha rajona (adtul pachodzić Hieroj Savieckaha Sajuza Alaksandr Čarnyš, a taksama były kiraŭnik «Minharśviatła» Valeryj Škiranda). Šynkievič skončyŭ Technałahičny instytut (1982), Vyšejšyja kursy KDB (1987), Akademiju kiravańnia pry prezidencie (2002).
Ad 1986 da 1995 słužyŭ u KDB. Ad 1995 — u słužbie achovy Łukašenki. Apošnija 7 hadoŭ źjaŭlaŭsia namieśnikam staršyni Słužby. Pałkoŭnik. Maje orden «Za słužbu Radzimie III stupieni».
Heta dziasiaty kiraŭnik Słužby achovy prezidenta ad 1994 hoda. Raniej uznačalvali:
- Viačasłaŭ Karaloŭ (1994 — 1995)
- Juryj Barodzič (1995 — 1998)
- Uładzimir Navumaŭ (1999 — 2000)
- Leanid Jeryn (vierasień—listapad 2000)
- Hienadź Niavyhłas (śniežań 2000 — vierasień 2001)
- Uładzimir Klimaŭ (vierasień—kastryčnik 2001)
- Jaŭhien Dviarnicki (2001 — 2003)
- Juryj Žadobin (2003 — 2007)
- Andrej Uciuryn (2007 — 2014)
«Napeŭna, viedajecie, što chtości razhladaŭ heta jak dobraje, udałaje, ciopłaje miesca, nie razumiejučy taho, kudy jon idzie, niekatoryja prosta chočuć pasprabavać siabie na hetaj pasadzie. Pierad mnoj byli dva momanty: pryznačać čałavieka z boku, kab strasianuć tym samym słužbu biaśpieki, ci ž pakinuć čałavieka, jaki doŭhi čas prasłužyŭ u Słužbie biaśpieki, dobra jaje viedaje, kab jamu nie davodziłasia vyvučać jaje, uklučacca dadatkova ŭ słužbu i tym samym hublać čas, — adznačyŭ Łukašenka. — Jak razumiejecie, času ŭ nas niama, kab razhojdvacca, u nas chapaje mierapryjemstvaŭ, dzie treba i zabiaśpiečvać biaśpieku prezidenta, i vyrašać inšyja pytańni, jakija lažać na Słužbie biaśpieki. Pry hetym u mianie jość masa pytańniaŭ da Słužby biaśpieki».
Kab trapić u Słužbu biaśpieki prezidenta, čałaviek musić prajści papiaredniuju pravierku (da niekalkich miesiacaŭ), žorstki psichałahičny adbor praz palihraf, mieć vydatnuju fizičnuju formu.
«Ab bodzihardach źniata šmat filmaŭ, sieryjałaŭ, napisana šmat knih. Naturalna, mnohija junaki marać stać padobnymi na kinahieroja Kievina Kostniera i imknucca stać supiermenami, bačać siabie bodzihardami VIP-pierson, — raskazvaŭ Viktar Šynkievič. —
Miž tym supracoŭniki SBP — zvyčajnyja chłopcy. Praŭda, jany majuć cudoŭnuju padrychtoŭku. Naprykład, vałodajuć apieratyŭnaj psichałohijaj, umiejuć kancentravacca na hałoŭnym, nie prapuskajučy drobiazi, niestandartna dumać i prymać pravilnyja rašeńni ŭ ekstremalnych situacyjach. Majuć natreniravanuju, zavostranuju ŭvahu, daviedzienyja da aŭtamatyzmu navyki dziejańniaŭ pry ŭźniknieńni pahrozy.
«Luboŭ da Radzimy i addanaść prezidentu», — takija hałoŭnyja patrabavańni da pracy ŭ Słužbie achovy nazyvaŭ Andrej Uciuryn.
«Realnaja praca ciełaachoŭnika nie takaja prostaja, jak zdajecca prostamu abyvacielu, i nie zvodzicca da pastajannaj stralby i adzinaborstvaŭ. Tak, z momantu zastupleńnia na słužbu supracoŭnik Słužby znachodzicca ŭ stanie hraničnaj uvahi i kancentracyi. Heta nie kino, i praliki ŭ pracy niedapuščalnyja. Bo ŭ rukach ciełaachoŭnika znachodzicca žyćcio achoŭnych asob, svaich tavaryšaŭ pa słužbie i inšych hramadzian», — heta znoŭ słovy Šynkieviča.
Słužba biaśpieki prezidenta — adna z samych zakrytych śpiecsłužbaŭ krainy. Nichto nie viedaje dakładnuju kolkaść ludziej, jakija pracujuć u hetaj struktury, ale viadoma, što lik idzie na sotni. Kiraŭnik słužby achovy — adna z klučavych pasad u siońniašniaj Biełarusi.
