Try čałavieki zahinuli i čaćviora atrymali ranieńni ŭ vyniku zachopu zakładnikaŭ u kaviarni Lindt u biznes-kvartale Sidneja.

Prykładna a druhoj hadzinie nočy pa miascovym časie aŭstralijskaja palicyja šturmavała kaviarniu, dzie ŭzbrojeny mužčyna bolš za 16 hadzin utrymlivaŭ zakładnikaŭ. Jak tolki pačaŭsia šturm, pačulisia vybuchi i stralba.

Jak paviedamiła palicyja, byli zabityja dvoje zakładnikaŭ i sam zachopnik. Jak miarkujecca, palicyjanty taksama vykarystoŭvali vybuchovyja pakiety, kab dezaryjentavać złačyncu.

Pierad hetym z kaviarniaŭ vybiehli, prynamsi, šeść čałaviek. Nieŭzabavie paśla pačatku šturmu vybiehli jašče bolš za dziesiać. Niekalki čałaviek vynieśli na nasiłkach.

Pradstaŭnik palicyi paviedamiŭ na pres-kanfierencyi ŭ Sidnei, što śpiecpadraździaleńni pačali šturm paśla taho, jak źjavilisia aściarohi, što žyćcio zakładnikaŭ apynułasia pad realnaj pahrozaj.

Pavodle jaho słoŭ, spačatku palicyja ličyła, što niepasredna pahrozy dla žyćcia zakładnikaŭ u chodzie pieramovaŭ z zachopnikam nie było. Ale prosta pierad šturmam situacyja źmianiłasia.

Raniej palicyja Aŭstralii nazvała imia čałavieka, jaki ŭtrymlivaŭ zakładnikaŭ - heta 50-hadovy Man Charon Monis, biežaniec ź Irana, jaki atrymaŭ u Aŭstralii palityčny prytułak.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?