Dniami ŭ Łondanie Centr Astrahorskaha i Anhła-Biełaruskaje tavarystva vydali biełaruskuju viersiju numara «Žurnała biełaruskich daśledavańniaŭ» za 2014 hod.

Novy numar źmiaščaje artykuły jak znanych navukoŭcaŭ, tak i maładych daślednikaŭ, biełaruskich i zachodnich aŭtaraŭ, jakija achoplivajuć šyroki aśpiekt tem – ad historyi biełaruskaj dziaržaŭnaści da biełaruska-iranskich dačynieńniaŭ i dziejnaści NDA, zasnavanych uradavymi strukturami ŭ Biełarusi. U numar taksama ŭvajšli čatyry knižnyja recenzii, napisanyja aŭtarami z ZŠA, Vialikabrytanii, Kanady i Polščy. 

Zmiest numara za 2014 hod

Adkryvajuć numar Darota Michaluk z univiersiteta Mikałaja Kapiernika (Toruń) i Per Anders Rudlinh z Łundskaha ŭniviersiteta. Jany daśledujuć raźvićcio idei biełaruskaj dziaržaŭnaści padčas niamieckaj akupacyi biełaruskich ziemlaŭ u 1918–1919 hadach. Aŭtary ŭvažajuć, što niamieckaja administracyja padtrymlivała biełaruski nacyjanalny ruch, kab ź jaho dapamohaj pasłabić inšyja nacyjanalnyja ruchi rehijona. U artykule taksama źviartajecca ŭvaha na toje, nakolki papularnymi siarod tahačasnych biełaruskich intelektuałaŭ byli idei dziaržaŭnaści histaryčnaj Litvy i «zachodnierusizmu».

Siarhiej Bohdan sa Svabodnaha ŭniviersiteta Bierlina analizuje biełaruska-iranskija dačynieńni, jakija ad času svajho ŭstalavańnia ŭ 1993 hodzie pieražyli šerah jakasnych i kolkasnych źmienaŭ. Istotny ŭpłyŭ na dačynieńni miž krainami mieła pieraŭtvareńnie ZŠA ŭ adzinuju supierdziaržavu, a taksama jaje sproby izalavać iranski režym. Biełarusi ŭdałosia zaklučyć šerah damovaŭ ź Iranam, niahledziačy na supraciŭleńnie z boku Zachadu i dziakujučy chaŭrusu z Rasiejaj, jakaja abaraniała i padtrymlivała roznyja aśpiekty źniešniaj palityki Biełarusi, u tym liku jejny kurs na supracoŭnictva ź Blizkim Uschodam.

Nastaśsia Matčanka razhladaje rolu praŭładnych niedziaržaŭnych arhanizacyjaŭ u Biełarusi. U adroźnieńnie ad sapraŭdy niezaležnych niedziaržaŭnych arhanizacyj, praŭładnyja NDA atrymlivajuć niepasrednuju padtrymku ad dziaržavy. Aŭtarka analizuje, u jakoj stupieni hramadskija ŭtvareńni, što padtrymlivajucca dziaržavaj, simulujuć dziejnaść prademakratyčnych arhanizacyj i nakolki maštabna adbyvajecca padmiena imi aŭtentyčnaj hramadzianskaj supolnaści ŭ Biełarusi.

U numar taksama ŭklučanyja knižnyja recenzii Vitaŭta Kipiela, prezidenta Biełaruskaha instytuta navuki i mastactva ŭ Ńju-Jorku, Arnolda Makmilina z Univiersiteckaha kaledža Łondana, Lizaviety Kasmač z univiersiteta Albierty i Ryhora Astapieni z Varšaŭskaha ŭniviersiteta. Temy pradstaŭlenych imi vydańniaŭ – asabistyja miemuary, biełaruskaje litaraturaznaŭstva, palityka savieckaj biełarusizacyi 1920-ch hadoŭ i historyja Vialikaha Kniastva Litoŭskaha. 

Džym Dynhli, sychodziačy staršynia Anhła-biełaruskaha tavarystva, źmiaščaje ŭ numary spravazdaču pra biełaruskija padziei ŭ Łondanie za apošni hod. Siarod hetych padziejaŭ adznačanaja kanfierencyja, pryśviečanaja roli Kastusia Kalinoŭskaha ŭ pracesie nacyjatvorčaści ŭ Biełarusi, što pryciahnuła navukoŭcaŭ ź Biełarusi, Vialikabrytanii, Polščy i Litvy.

Z historyi «Žurnała biełaruskich daśledavańniaŭ»

U minułym hodzie paśla dvaccaci piaci hadoŭ maŭčańnia «Žurnała biełaruskich daśledavańniaŭ» adnaviŭ svaju dziejnaść. Pavodle zadumy «Žurnał» pavinien stacca płatformaj, na jakoj biełaruskija i zachodnija biełarusisty zmohuć drukavać vyniki svaich daśledavańniaŭ.

Časopis vychodzić pa-anhielsku i pa-biełarusku. Z adnaho boku, heta dazvolaje biełarusam pakazać krainu i jaje raźvićcio sa svajoj pierśpiektyvy na anhielskaj movie i ŭ adpaviednaści sa standartami zachodnich recenzavanych vydańniaŭ. Z dapamohaj časopisa zachodnija akademičnyja struktury bližej paznajomiacca ź biełaruskimi daślednikami.

Ź inšaha boku, biełaruskaja viersija časopisa dapamoža zachodnim biełarusistam patrapić u mejnstrym biełaruskaha navukovaha žyćcia i prabicca da bolš šyrokaha koła čytačoŭ u Biełarusi.

Papiarovuju viersiju apošnich numaroŭ žurnała možna nabyć praz Internet. Elektornnyja viersii artykułaŭ z numaroŭ za 2014 i 2013 hody i anhielskamoŭnych numaroŭ z 1965 hodu možna biaspłatna spampavać na sajcie belarusjournal.com.

Žurnał zaprašaje dasyłać artykuły daŭžynioj ad 5 da 12 tysiač słovaŭ i ahlady knih z usich halin biełaruskich daśledavańniaŭ. Vydańnie nadaje asablivuju ŭvahu prablemam biełaruskaha hramadstva i historyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?