«U našych papiarednich biuleteniach my sfarmulavali paniaćcie biełaruskaha zazoru. Jano fiksuje roźnicu biełaruskaj i rasijskaj hramadskaj dumki pa šerahu pytańniaŭ. U pieršuju čarhu, pa Ukrainie», — raskazvaje «Našaj Nivie» kiraŭnik analityčnaha centra, doktar sacyjałahičnych navuk Andrej Vardamacki.

U jakaści prykładu Vardamacki pryvioŭ staŭleńnie da «rasiejskaha Krymu». Pa jaho słovach, z adnaho boku, u biełaruskaj hramadskaj dumcy rasijski kancept daminuje, ale ź inšaha — isnuje vialikaja kolkasnaja roźnica pamiž rasijskim i biełaruskim usprymańniem hetych padziej.

U Biełarusi ŭ vieraśni 2014 dałučeńnie Kryma ličyli zakonnym i spraviadlivym 68 pracentaŭ biełarusaŭ, tady jak u Rasiei heta byŭ 91 pracent. Roźnica zaklučajecca ŭ tym, što ŭ Biełarusi heta prosta bolšaść, a ŭ Rasii — absalutnaja.

Što ž adbyłosia za vosień? «Kolkaść tych u Biełarusi, chto apraŭdvaje dałučeńnie Kryma pa vynikach listapadaŭskaha apytańnia Biełaruskaj Analityčnaj Majsterni skłała ŭžo ŭsiaho 59,9 adsotkaŭ u paraŭnańni z 67,8 pracentami ŭ vieraśni, heta značyć na 7,9 pracentaŭ mienš. A heta ŭžo statystyčna značnaja vieličynia, jakaja vychodzić za ramki chibnaści», — kaža Vardamacki.

Padaje i davier da Rasii, jak da bratniaj dziaržavy. Vyrasła kolkaść tych, chto ličyć, što Rasija moža raspačać u adnosinach da Biełarusi dziejańni, anałahičnyja dziejańniam adnosna Ukrainy.

Prafiesar taksama zaŭvažaje padzieńnie prarasijskich aryjentacyj i padjom prajeŭrapiejskich. Pryčynami hetaha jon nazyvaje biełaruska-rasijskija handlovyja vojny, infarmacyju z Ukrainy i ŭžo vidavočnuju mižnarodnuju izalacyju Rasii.

«Hety praces nasiŭ u papiarednija miesiacy nazapašvalny charaktar. Dynamiku jak prarvała mienavita da listapada. Adnak — i my zaŭsiody heta padkreślivajem — pabačym dalejšaje raźvićcio. Pra što idzie havorka — pra zvyčajnyja fłuktuacyi ci hienieralnym kirunak — pakažuć tolki trendy nastupnych rehularnych vymiareńniaŭ», — padkreślivaje Vardamacki.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?