20 śniežnia adbyŭsia Sojm Partyi BNF, na jakim było razhledžana pytańnie pra pahłybleńnie ekanamičnaha kryzysu ŭ Biełarusi, što supravadžajecca padzieńniem kursu nacyjanalnaj valuty. Sojm daŭ palityčnuju acenku najaŭnaj ekanamičnaj situacyi, paviedamlaje pres-słužba partyi.

U admysłovaj zajavie Sojm Partyi BNF uskłaŭ adkaznaść za destabilizacyju nacyjanalnaj valuty na dziejučaje kiraŭnictva krainy, čyj palityčny kurs pahłyblaje zaležnaść Biełarusi ad Rasiei.

U pryvatnaści, u zajavie adznačajecca: 

— nieabchodnaj pieradumovaj doŭhaterminovaj stabilizacyi biełaruskaj ekanomiki pavinny być vychad z Mytnaha sajuza i Jeŭrazijskaha ekanamičnaha sajuza, jakija prademanstravali svaju niebiaśpiečnaść dla našaj krainy.

— urad Biełarusi, jaki dapuściŭ abiasceńvańnie nacyjanalnaj valuty i nie maje zdolnaści da pieraadoleńnia jahonych nastupstvaŭ, pavinny syści ŭ adstaŭku.

— dla pieraadoleńnia nastupstvaŭ valutnaha kryzisu i praviadzieńnia nieadkładnych strukturnych reformaŭ pavinny być pryznačany Urad z udziełam ekanamistaŭ, jakija stajać na pazicyjach hłybokaha refarmavańnia nacyjanalnaj ekanomiki na karyść volnaha rynku i buduć kiravacca ŭ svajoj dziejnaści nacyjanalnymi intaresami, a nie intaresami vyžyvańnia siońniašniaj niedziejazdolnaj sacyjalna-ekanamičnaj madeli aŭtarytaryzmu.

— nieabchodna uklučeńnie ŭ praces abmierkavańnia i ažyćciaŭleńnia prahramy rynkavych reformaŭ ekśpiertaŭ palityčnych partyj, pradstaŭnikoŭ zamiežnych finansavych instytucyjaŭ.

— Alaksandr Łukašenka, jaki nie vykarystaŭ dastupnyja jamu čas i srodki dziela źmiańšeńnia zaležnaści biełaruskaj ekanomiki ad Rasiei, što pryviało da ekanamičnaj słabaści i nieabaronienaści, nie maje prava bałatavacca na prezidenckich vybarach.

— U metach źniaćcia pieraškodaŭ dla atrymańnia finansavaj dapamohi mižnarodnych instytucyj na praviadzieńnie reformaŭ i pryciahnieńnia zamiežnych inviestycyj dziela zabieśpiačeńnia ekanamičnaha rostu treba nieadkładna vyzvalić usich viaźniaŭ sumleńnia, unieści źmieny ŭ vybarčaje zakanadaŭstva dy źmianić praktyku jaho prymianieńnia z metaj praviadzieńnia svabodnych demakratyčnych vybaraŭ.

Sojm Partyi BNF uściešany tym, što Alaksandr Łukašenka narešcie pahadziŭsia z našaj acenkaj palityki Rasii ŭ dačynieńni da Biełarusi, nazvaŭšy hetuju palityku «hłupoj i biezmozhłoj», i čakaje ad jaho kankretnych krokaŭ pa vychadzie ź Jeŭrazijskaha sajuza, adznačajecca ŭ zajavie pres-słužby.

Клас
0
Панылы сорам
0
Ха-ха
0
Ого
0
Сумна
0
Абуральна
0