Škłoŭski sud pakaraŭ namieśnika staršyni Partyi BNF Ryhora Kastusiova na 25 bazavych vieličyniaŭ (3 miljony 750 tysiač rubloŭ) za ŭdzieł va ŭšanavańni paŭstancaŭ Kastusia Kalinoŭskaha.

Sudździa Śviatłana Barančykava kvalifikavała heta jak niesankcyjanavanaje masavaje mierapryjemstva. Palityk svajoj viny nie pryznaŭ i budzie abskardžvać vyrak.

Suprać Kastusiova śviedčyli dvoje supracoŭnikaŭ milicyi, jakija składali pratakoł.

Pavodle palityka, u materyjałach spravy było šmat parušeńniaŭ. Siarod ich jon nazyvaje praterminoŭku składańnia pratakołu. Na milicejskim videazapisie ciažka razabrać, kaža palityk, chto pra što havoryć. Taksama na videazapisie adsutničała data.

Ryhor Kastusioŭ ličyć, što dasłanyja sa Śvisłačy ŭ Škłoŭski sud materyjały spravy nie pavinny byli prymacca dla razhladu.

«Adnaznačna, ułady imknucca zapałochać nia tolki ŭdzielnikaŭ mierapryjemstva, jak nazvali milicyjanty naviedvańnie pamiatnych miaścinaŭ, źviazanych z paŭstańniem Kalinoŭskaha, ale i ŭsiu hramadzianskuju supolnaść Biełarusi. Chutka 2015 hod i prezydenckija vybary. Užo adbyvajecca papiaredniaja začystka, kab vybary pravieści jak maha spakajniej i z bolš vyhadnym pakazčykam dla pieramožcy», — kamentuje vyrak Ryhor Kastusioŭ.

Kastusioŭ staŭ dvanaccatym udzielnikam akcyi pa ŭšanavańni kalinoŭcaŭ, jakoha pakarali štrafam. Amal usich aktyvistaŭ karali adnolkava — 25 bazavymi vieličyniami, jak i Kastusiova.

Ušanoŭvali kalinoŭcaŭ u Śvisłačy 26 kastryčnika.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?