Z Urała hrupy rasijskich bajevikoŭ adpraŭlajucca vajavać na terytoryju Ukrainy pad vyhladam Čyrvonaha Kryža i humanitarnaj dapamohi, raspavieŭ u intervju jekacierynburhskamu sajtu e1.ru arhanizatar takich apieracyj.
«Pieršy raz jany pajechali pad vyhladam Čyrvonaha Kryža. Atrymlivali ad miascovaha filijała papiery, što my supravadžajem. Kali dajechali, ludi tam zastalisia. Im dali zbroju i bajavyja zadačy», — kaža kiraŭnik śviardłoŭskaha fonda vieteranaŭ śpiecnazu Uładzimir Jafimaŭ.
Apošnim časam bajevikoŭ adpraŭlajuć z «humanitarnaj dapamohaj».
«Zaraz hetak ža hruzim chłopcaŭ u mašynu z humanitarnaj dapamohaj i adpraŭlajem. Jeduć u siarednim na miesiac. Niekatoryja ŭ adpačynak, niekatoryja, vierahodna, kab zarabić», — raspavioŭ Jafimaŭ, jaki taksama ŭdzielničaje ŭ «kazačym ruchu».
Zarobki bajevikoŭ-šarahoŭcaŭ mohuć dachodzić da 1-1,5 tysiač dalaraŭ u miesiac, aficeraŭ — da 5 tysiač, kaža jon.
Bajeviki sa Śviardłoŭskaj vobłaści RF jeduć vajavać suprać Ukrainy.
Sajt paviedamlaje, što jak minimum try žychary rehijona ŭžo zahinuli va Ukrainie padčas bajoŭ, jašče adzin zastaŭsia biez nahi. 14 śniežnia ŭ Jekacierynburhu ŭračysta dali ŭznaharody 8 uralskim bajevikam, jakija viarnulisia z Ukrainy.
Pieršyja hrupy bajevikoŭ, kaža Jafimaŭ, byli arhanizavanyja jašče padčas anieksii Kryma: «Pieršaprachodcami byli ludzi z Chanty-Mansijska — vieterany śpiecnaza, kazaki… Usio zrabili na svaje hrošy, zabrali mianie, pajechali. Kali dabralisia da Kierčy, ja ŭsio arhanizavaŭ — pieradaŭ chłopcaŭ adkaznym ludziam, jakija dałučyli ich da bazy, i ŭ vyniku jany stali «vietlivymi ludźmi».
Z červienia vajavać suprać Ukrainy Jafimaŭ, pa jahonym słovam, adpraviŭ 6 hrup pa 15-30 čałaviek u Danieck i 2 hrupy pa 30 čałaviek u Łuhansk. Pryčym najbolš padrychtavanych adpraŭlajuć u «DNR», a samych słabych — u «ŁNR».
Zbroju navabrancam vydajuć na miescy.
«Heta ŭsio sprava prymajučaha boku. Pryjechaŭ, pastaviŭ podpis, atrymaŭ. Nazad pajechaŭ — zdaŭ», - kaža Jafimaŭ.
Pa jahonych słovach, niama dadzienych, kolki ŭsiaho zahinuła rasijskich dabraachvotnikaŭ na Danbasie, bo nichto nie viadzie ahulnaj statystyki ani kolkaści adpraŭlenych, ani kolkaści zabitych i paranienych.
Vykarystańnie emblemaŭ Čyrvonaha Kryža ludźmi, jakija źjaŭlajucca ŭdzielnikami bajavych dziejańniaŭ, ličycca ŭ mižnarodnym pravie vajskovym złačynstvam.
