Śviedkami niezvyčajnaj pryrodnaj źjavy stali siońnia žychary Homiela — nad centralnaj častkaj horada praniesłasia sapraŭdnaja navalnica.
Spačatku na niebie ŭspychnuła šyrokaja małanka, a śledam pačuŭsia raskat hromu. Paśla hetaha pačaŭsia mocny śniehapad, jaki praciahvaŭsia 10 chvilin. Zatym nieba nad abłasnym centram, jakoje niekalki hadzin było zaciahnuta chmarami, rezka praśviatleła i navat vyblisnuła sonca.
Małanka ŭdaryła ŭ teleradyjecentr i paškodziła abstalavańnie, na karotki čas było spyniena viaščańnie abłasnoha radyjo.
U redakcyi Homielskaha abłasnoha radyjo BiełaPAN paviedamili, što zaraz viaducca naładačnyja pracy.
Pa słovach staršyni abłasnoha kamiteta pryrodnych resursaŭ i achovy navakolnaha asiarodździa Vasila Masłaka, navalnica, choć i nie typovaja zimoj dla našych šyrot, adbyvajecca pieryjadyčna. Pryčynaj źjaŭlajecca parušeńnie ŭ sistemie farmiravańnia atmaśfiernych słajoŭ.
«Chałodnyja i ciopłyja patoki pavietra ŭ adnosinach da ziamli pamianialisia miescami. Naprykład, padčas apošniaha pachaładańnia tempieratura pavietra ŭ ziamli dachodziła da minus 15 hradusaŭ, a na vyšyni ŭ niekalki kiłamietraŭ była plus 2 hradusy. Vidać, zaraz pryroda vypraŭlaje heta nieadpaviednaść», — skazaŭ BiełTA surazmoŭca.
