Iranski hienierał, jaki byŭ daradcam va ŭzbrojenych farmavańniach isłamisckaj hrupoŭki «Chiezbała» ŭ Siryi, zahinuŭ u vyniku izrailskaha avijacyjnaha ŭdara, zajaviŭ aficyjny Tehieran na pačatku hetaha tydnia.
Razam z hienierałam Machamiedam Ali Ałachdadzi zahinuli šeść bajevikoŭ livanskaj isłamisckaj arhanizacyi, paviedamiŭ sajt kanała Foxnews.
Izrail nie padćvierdziŭ, ale i nie abvierh infarmacyju pra toje, što jahonyja siły praviali bambiožku siryjskaj terytoryi.
Livanskaja šyickaja hrupoŭka «Chiezbała», jakaja padtrymlivaje ščylnyja suviazi ź Iranam, pačała ŭdzielničać u siryjskaj hramadzianskaj vajnie na baku režyma Bašara Asada z 2012 hoda, asnoŭnymi praciŭnikami jakoha źjaŭlajucca roznaha rodu suńnickija — isłamisckija ci prademakratyčnyja arhanizacyi.
Pradstaŭniki izrailskaj raźviedki, jakich cytujuć miedyi, nie vyklučajuć, što pradstaŭniki Irana i «Chiezbały» mahli płaniravać ataki suprać Izraila ŭzdoŭž izrailska-siryjskaj miažy.
Hetak, u sakaviku 2014 hoda bajeviki padarvali na miažy džyp ź izrailskimi žaŭnierami, u vyniku čaho atrymaŭ ciažkija ranieńni adzin čałaviek.
Takim čynam, Izrail demanstruje «Chiezbale», Iranu i Bašaru Asadu, što nie dazvolić livanskaj isłamisckaj hrupoŭkie dziejničać uzdoŭž svajoj miažy ź Siryjaj, ličać analityki, jakich cytuje amerykanski infarmacyjny sajt mcclatchydc.com.
7 śniežnia 2014 hoda Izrail razbambiŭ u Siryi schoviščy z atrymanymi ad Rasii rakietnymi kompleksami S-300, jakija mahli patrapić «Chiezbale»
