«Nazirajcie, ale nie haračyciesia», — napisaŭ kamientataram u svaim Facebook viadomy ŭkrainski aficer-desantnik pa mianušcy «Maršał», jaki vosieńniu prasłaviŭsia ŭdziełam u abaronie Danieckaha aeraporta.

«Maršał» (u centry) ź siabrami pa zbroi padčas abarony Danieckaha aeraporta, uainfo.org

«Maršał» (u centry) ź siabrami pa zbroi padčas abarony Danieckaha aeraporta, uainfo.org

Kali na minułym tydni rasijskija bajeviki sprabavali šturmam uziać Daniecki aeraport, situacyja na Danbasie rezka abvastryłasia, znoŭ pačalisia maštabnyja bajavyja dziejańni z masiravanym vykarystańniem tankaŭ i artyleryi. Heta vyklikała buru emocyj u karystalnikaŭ internetu va Ukrainie, roznaha rodu čutki, a taksama abvinavačańni ŭ bok ukrainskaha vajennaha kiraŭnictva.

«Aeraport, aeraport, aeraport!!! AAA… Vysnova takaja skłałasia, (kali) pačytaŭ. Kali kožny budzie telefanavać svajmu siabru, a toj svajmu, to internet poŭnicca nuuu vielmi roznaj infarmacyjaj, i ŭsie ŭ napružańni, a jašče adzin adnaho vietliva pasyłajuć…», — piša aficer, jaki za bajavyja zasłuhi miesiac tamu atrymaŭ orden Bahdana Chmialnickaha.

Ahresija Rasii suprać Ukrainy, jakaja pačałasia viasnoj 2014 hoda, pryviała da pačatku vajny, jakaja pry svaich vialikich maštabach i napružanaści charaktaryzavałasia adnačasova niečuvanaj infarmacyjnaj adkrytaściu z boku Ukrainy, dzie ŭ boj pajšła vielizarnaja kolkaść dobraachvotnikaŭ, a kožnuju vajskovuju častku dadatkova padtrymlivajuć cyvilnyja vałanciory.

Mnohija cyvilnyja pišuć pra padziei na froncie amal štodzionna, a kamientatary raznosiać naviny pa ŭsim internecie.

«I voś, siadzić bajec u akopie, telefanuje siabru, kaža, što ŭsich kinuli, a toj u svaju čarhu nalivaje ŭ Fejsbuk viadro kryku… I tak koooožny dzień. Jak byccam FB — heta linija 911 na vajnie, a ŭsie čytačy sa startu pačynajuć parafinić usich kamandziraŭ i načalnikaŭ», — piša «Maršał».

«Maršał» nahadvaje, što dalahlad žaŭniera, jaki znachodzicca ŭ akopie, vielmi vuzki, tamu nie treba rabić dalokasiahajučych vysnoŭ z taho, što na tym ci inšym adrezku linii frontu ŭskładniłasia situacyja.

Toj, chto nikoli nie sutykaŭsia z vajnoj, ničoha pra jaje nie viedaje, adznačaje aficer.

«Na vajnie zaŭsiody ciažka, zaŭsiody choładna, zaŭsiody horača, zaŭsiody niazručna, zaŭsiody strašna, zaŭsiody pieramohi, zaŭsiody paraza, zaŭsiody pamyłki, zaŭsiody vopyt, zaŭsiody straty, zaŭsiody pakutujuć mirnyja žychary… Heta nie ŭ kontrstrajk pahulać», — piša aŭtar, zapeŭnivajučy čytačoŭ u tym, što va ŭkrainskaj armii šmat dobrych kamandziraŭ, jakija turbujucca pra svaich padnačalenych.

Front vialiki, straty niasuć usie, prajhranyja bai byli i buduć, ale heta nie značyć, što vajna budzie prajhranaja, zaklučaje «Maršał».

«A to, hledziačy pa FB, my vajnu prajhrali, a heta daloka nie tak», — dadaje jon.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?