Sud Centralnaha rajona Minska pryznaŭ udzielnikaŭ akcyi ŭ pamiać hierojaŭ Niabiesnaj sotni (tak zavuć zahinułych u studzieni—lutym 2014 hoda jeŭramajdanaŭcaŭ), jakaja prajšła ŭ Minsku viečaram 22 studzienia, vinavatymi ŭ parušeńni paradku arhanizacyi i praviadzieńni masavaha mierapryjemstva (art. 23.34 KoAP).
Maksim Viniarski i Aleś Makajeŭ pakaranyja administracyjnymi aryštami na 15 sutak, Jaŭhien Batura i Mikałaj Kołas — na 10 sutak, Volha Mikałajčyk — na 5 sutak, paviedamlaje pravaabarončy sajt spring96.org. Ich spravy razhladała sudździa Viktoryja Šabunia na vyjaznym pasiadžeńni, jakoje prajšło prosta va UUS Centralnaha rajona, kudy napiaredadni viečaram byli dastaŭlenyja zatrymanyja.
Pravaabaroncy paviedamlali, što spravy razhladalisia ŭ zakrytym režymie, adnak Viarchoŭny Sud u svaim pres-relizie paviedamiŭ, što pracesy nasili choć i vyjazny, ale adkryty charaktar.
Administracyjnaja sprava piensijanierki Niny Bahinskaj, jakaja taksama była zatrymanaja viečaram 22 studzienia, ale zatym adpuščanaja z RUUS, razhladałasia siońnia ŭ budynku suda Centralnaha rajona. Žančyna aštrafavanaja na 20 bazavych vieličyń (3 młn. 600 tys. rubloŭ).
Nahadajem, viečaram 22 studzienia aktyvisty pryjšli da pomnika Tarasu Šaŭčenku, raźmieščanamu niedaloka ad pasolstva Ukrainy, uskłali kvietki, zapalili śviečki i razharnuli vialiki partret Michaiła Žyźnieŭskaha — biełarusa, zahinułaha va Ukrainie roŭna hod tamu na vulicy Hrušeŭskaha ŭ Kijevie. Paśla akcyi jany byli zatrymanyja milicyjaj i dastaŭlenyja va UUS Centralnaha rajona. Pavodle danych pravaabaroncaŭ, u dačynieńni da niekatorych zatrymanych užyvałasia fizičnaja siła. Paśla paŭnočy čaćviora aktyvistaŭ byli adpuščanyja.
Čakałasia, što udzielnikaŭ akcyi buduć sudzić u budynku suda Centralnaha rajona, adnak sudździa Šabunia vyrašyła razhledzieć ich spravy na vyjaznym pasiadžeńni ŭ RUUS.
