U lutym Biełaruś płanuje naviedać ministr zamiežnych spraŭ Łatvii Edhars Rynkievičs, paviedamiŭ 23 studzienia na pres-kanfierencyi ŭ Minsku dziaržsakratar łatvijskaha MZS Andrejs Piłdehovičs.
Jon vykazaŭ nadzieju na toje, što za čas, jaki zastaŭsia da vizitu, baki «padrychtujuć hlebu dla surjoznaha ŭmacavańnia dyjałohu».
Apošni raz Edhars Rynkievičs naviedvaŭ Biełaruś prykładna dva hady tamu. 10 krasavika 2013 hoda ŭ Viciebsku adbylisia jaho pieramovy z kiraŭnikom biełaruskaha MZS Uładzimiram Makiejem. A 22 krasavika taho ž hoda na pasiadžeńni ministraŭ zamiežnych spraŭ krain ES u Luksiemburhu Rynkievičs zaklikaŭ Jeŭrasajuz da dyjałohu ź Biełaruśsiu.
U lutym 2014-ha Ryhu naviedaŭ Uładzimir Makiej. Pa vynikach jaho sustrečy z Edharsam Rynkievičsam było zajaŭlena, što ŭ dvuchbakovym supracoŭnictvie Biełarusi i Łatvii nazirajecca «pazityŭnaja dynamika» — jak u ekanamičnaj, tak i ŭ palityčnaj śfierach. Rynkievičs, u pryvatnaści, zajaviŭ: «Było b dobra, kali b da ryžskaha samita Uschodniaha partniorstva byŭ zaklučany dahavor ab libieralizacyi vizavaha režymu pamiž ES i Biełaruśsiu».
Staršynstva ŭ Jeŭrasajuzie pierajšło da Łatvii 1 studzienia 2015 hoda. Čaćviorty samit Uschodniaha partniorstva projdzie ŭ Ryzie 21—22 maja hetaha hoda.
