biathlonworld.com
Viadučaja biełaruskaja bijatłanistka Darja Domračava dasiahnuła čarhovaha vydatnaha vyniku ŭ hetym siezonie, staŭšy pieramožcaj žanočaj spryntarskaj honki na 7,5 km z dvuma ahniavymi rubiažami, jakaja siońnia adbyłasia na 6-m etapie Kubka śvietu ŭ italjanskim Antcholcy-Antersielvie.
Domračava prabiehła dystancyju za 19 chvilin 57,8 siekundy pry idealna dakładnaj stralbie. Druhoj finišavała jaje hałoŭnaja supiernica ŭ baraćbie za pieršuju pazicyju ŭ ahulnym zaliku Kubka śvietu finskaja bijatłanistka Kajsa Miakiarajnien (+26,9 siek.; 1 promach). Na treciuju prystupku pjedestała honaru zdoleła ŭzyści niamieckaja spartsmienka Łaŭra Dalmajer (+50,4; 0).
Trochrazovaja alimpijskaja čempijonka Domračava damahłasia 24-j pieramohi ŭ asabistych honkach top-spabornictvaŭ za čas karjery.
Akramia taho, u ahulnym zaliku žanočych spryntarskich honak Kubka śvietu hetaha siezona jana vyjšła ŭ lidary (249 ačkoŭ), adsunuŭšy ŭniz italjanku Darotu Virer. Taja skaciłasia adrazu na 3-je miesca (234), prapuściŭšy napierad jašče i Miakiarajnien (245).
Biełaruska Nadzieja Skardzina siońnia stała 7-j (+1.09,5; 0).
U subotu ŭ Antcholcy projdzie honka pieraśledu (pahonia). Pačatak u 17:30.
U ahulnym zaliku Kubka śvietu Darja Domračava zastajecca na 2-j pazicyi (560 ačkoŭ). U Kajsy Miakiarajnien stała 612 bałaŭ. Treciaj u hetym śpisie idzie ukrainka Valancina Siemiarenka (479). Nadzieja Skardzina - 13-ja (286)….
+ bonusnaje fota našaj Nadziei Skardziny ŭ vyšyvancy:), biathlonworld.com
