Samy jomisty ŭ fłocie «Biełavija» Boeing 737-800 papoŭniŭ pavietrany park biełaruskaj avijakampanii. 23 studzienia samalot prybyŭ u nacyjanalny aeraport Minsk.
Jak paviedamiŭ žurnalistam u aeraporcie hienieralny dyrektar «Biełavija» Anatol Husaraŭ, samalot pryznačany dla pieravozki 189 pasažyraŭ u ekanamičnym kłasie absłuhoŭvańnia. Jaho nabyćcio daść mahčymaść pradpryjemstvu raźvivać pieravozki na rehularnych i čartarnych napramkach.
«My płanujem pačać ekspłuatavać naš pieršy Boeing 737-800 najbližejšymi dniami», — skazaŭ hiendyrektar. Pavodle jaho słoŭ, ekanamičnaja efiektyŭnaść samalota dazvolić skaracić zatraty na pieravozki, što budzie spryjać źnižeńniu koštu pieralotu.
Boeing 737-800 prybyŭ u Minsk paśla prachodžańnia techničnaha absłuhoŭvańnia pierad pačatkam ekspłuatacyi avijakampanijaj «Biełavija».
Samaloty liniejki Boeing 737 NG (Next Generation) bolš ekanamičnyja i zdolnyja vykonvać paloty bolšaj dalokaści ŭ paraŭnańni z papiarednim pakaleńniem, da jakoha adnosiacca Boeing 737-300 i 737-500, jakija jość u fłocie «Biełavija».
Jak skazaŭ Husaraŭ, samalot nabyty ŭ apieratyŭny lizinh na šeść hadoŭ na padstavie kantrakta ź lizinhavaj kampanijaj AerCap Partners I Limited. Hetaje pavietranaje sudna 2000 hoda vypusku i znachodzicca ŭ vielmi dobrym techničnym stanie. Raniej hety Boeing 737-800 ekspłuatavała adna ź niamieckich avijakampanij. Jaho košt składaje prykładna 28 młn. dołaraŭ. Pry hetym cana novaha anałaha ŭ katałozie — pryblizna 100 młn. dołaraŭ ZŠA.
Pavodle słoŭ hiendyrektara «Biełavija», samalot budzie vykarystoŭvacca avijakampanijaj na rehularnych linijach vialikaj praciahłaści na najbolš zahružanych napramkach. Boeing 737-800 budzie latać u Ałmaty, Barsiełonu, Łarnaku, Tel-Aviŭ, a taksama na najbolš nahružanych čartarnych napramkach — u Turcyju, Bałharyju, Hrecyju.
