81-hadovaja žycharka Pieciarburha pamierła ŭ aŭtorak, 3 lutaha, na parozie adździeła palicyi Kranštata, kudy jaje pryvieźli paśla mahazinnaha kradziažu, paviedamiła pres-słužba rehijanalnaha ŭpraŭleńnia MUS

Žančynu zatrymali kala 15:30, paśla čaho pryvieźli ŭ palicyju. Na ŭvachodzie piensijaniercy stała kiepska, palicejskija vyklikali «chutkuju dapamohu», adnak miedyki nie zmahli jaje vyratavać. Daktary dyjahnastavali, što žančyna pamierła ad vostraj sardečnaj niedastatkovaści.

U paviedamleńni palicyi skazana, što žycharku Kranštata palicyi pieradała administracyja kramy, jakaja zatrymała jaje za kradziež tavaru, nazva jakoha nie zhadvajecca. 81-hadovuju žančynu abvinavacili ŭ kradziažy troch pačkaŭ masła z kramy «Mahnit» na Šyrokaj vulicy. Ahulny košt skradzienaha nie pieravysiŭ 300 rasijskich rubloŭ (kala 69 tys. biełaruskich).

Vyśvietliłasia, što piensijanierka źjaŭlałasia błakadnicaj.

Kiraŭnik rajonnaj jačejki Ema Lošyna acharaktaryzavała zahinułuju žančynu jak akuratnuju i pryjemnuju ŭ znosinach. Jana dadała, što nie vieryć, byccam piensijanierka nieadnarazova ździajśniała mahazinnyja kradziažy.

«My ličym, što ŭ jaje było časovaje pamutnieńnie, a kali jaje dastavili ŭ palicyju, jana ŭśviadomiła toje, što zdaryłasia, i sumleńnie nie vytrymała», — skazała Lošyna.

«Mahčyma, kali jana pajšła ŭ kramu, u jaje heta i zdaryłasia. Zrazumiejcie pravilna, ja nie chaču skazać, što jana była nie ŭ sabie, ale my ŭžo staryja. Pamiać u mnohich užo hublajecca… U toje, što jana zrabiła niešta złačynnaje i naŭmysnaje, my, viadoma, nie vierym. Heta plama na nas, błakadnikach…

Jana była zabiaśpiečanym piensijanieram. Jak błakadnicaj jana atrymlivała 25 tysiač rubloŭ u miesiac (5,75 młn biełaruskich u ekvivalencie). A hetyja handlovyja sietki hatovyja za kapiejki zabić čałavieka», — dadała Lošyna ŭ razmovie z radyjostancyjaj «Echo Pietierburha».

Paśla vypadku supracoŭniki mahazina začynilisia «pa techničnych pryčynach». 

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?