Supracoŭniki Słužby biaśpieki Ukrainy zatrymali padpałkoŭnika Hienieralnaha štaba Uzbrojenych sił Ukrainy, jaki źjaŭlajecca adnym z arhanizataraŭ fejkavaha «šturmu» Administracyi prezidenta 3 lutaha.

Pra heta zajaviŭ kiraŭnik SBU Valancin Nalivajčanka na bryfinhu ŭ sieradu, 4 lutaha.

Pavodle jaho słoŭ, vysokapastaŭleny čynoŭnik Hienštaba zatrymany razam ź inšymi ŭdzielnikami złačynnaj hrupoŭki, jakija padbuchtorvali na pratestnyja akcyi dezierciraŭ dobraachvotnickich bataljonaŭ, a taksama «ludziej u vajennaj formie, jakija nikoli nie byli ŭ ATA».

«15 chvilin tamu zaviaršyłasia apieracyja. Nami zatrymanyja arhanizatary ŭčorašnich sprobaŭ pravakacyj u centry Kijeva», — skazaŭ jon.

«Nami zatrymany hramadzianin Ukrainy, padpałkoŭnik adnaho z kirujučych padraździaleńniaŭ Hienštaba, jaho proźvišča Čarnabaj, 1974 hoda naradžeńnia», — zajaviŭ kiraŭnik SBU.

Zatrymali taksama saŭdzielnika hetaha čynoŭnika — pradstaŭnika «terarystyčnaj arhanizacyi DNR, jaki arhanizoŭvaŭ padryŭnuju i špijonskuju dziejnaść na našaj terytoryi, jaho proźvišča — Maleška».

Pa słovach Nalivajčanki, padpałkoŭnik Čarnabaj, karystajučysia słužbovym stanoviščam i pracujučy instruktaram u adnym z dobraachvotnickich bataljonaŭ, padavaŭ bajcam iłžyvuju infarmacyju ab zavyšanych stratach sił ATA na Danbasie, čym padbuchtorvaŭ ich da pratestnych akcyj.

Akramia taho, jon raźvivaŭ ahienturnuju sietku dla hetaj padryŭnoj dziejnaści.

Pres-centr SBU udakładniaje, što zdradnik pieradavaŭ pa siektarach dakładnyja kaardynaty dobraachvotnickich bataljonaŭ bajevikam «dla viadzieńnia artyleryjskich abstrełaŭ».

«Zdradnik-pravakatar, jakomu rasijskija kuratary dali pazyŭny «Siamionavič», pieradavaŭ sakretnyja dadzienyja ab dysłakacyi i pieramiaščeńni ŭkrainskich vajennych padraździaleńniaŭ bajeviku t.zv. «DNR» Malešku na mianušku «13». Złamyśniki kanśpiravalisia, sustrakalisia ŭ abumoŭlenych miescach pieradačy infarmacyi, pastajanna źmianiajučy kartki mabilnaj suviazi», — paviedamili ŭ SBU.

Złačynna zdabytyja sakretnyja dadzienyja, vydavańnie jakich składaje pahrozu abaranazdolnaści dziaržavy, «13» pieradavaŭ vierchavodu artyleryjskaj bryhady terarystaŭ «Kalmius».

Padčas čarhovaj pieradačy sakretnaj infarmacyi abodvuch złamyśnikaŭ zatrymali supracoŭniki SBU.

Pa źviestkach viedamstva, hetaja hrupa zahadzia paviedamlała ŚMI, padkantrolnym rasijskim śpiecsłužbam, ab spłanavanych dyviersijach, dziakujučy čamu pradstaŭniki rasiejskich telekanałaŭ pieršymi akazvalisia na miescy padziei i padavali ich skažona.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?