Fota: kv.by
Fota dakumientu, što pradstaviła redakcyja kv.by, nie utrymlivaje dat i podpisaŭ, a taksama numar Dekreta. Redakcyja kaža ab podpisie na dakumiencie ministra finansaŭ Amaryna.
Zhodna z prajektam Dekreta, adprybytkovy padatak dla supracoŭnikaŭ PVT pavialičycca z 9% da 10% (suprać 12% pa krainie), a płaciažy kampanij-rezidentaŭ PVT u Fond sacyjalnaj abarony nasielnictva pavialičacca ŭ try razy.
Mienavita padatkovyja lhoty pryviali da 30-kratnaha rostu PVT za apošnija 10 hod, śćviardžaje redakcyja. Razam z rostam PVT vyraśli valutnyja pastupleńni, u tym liku ad dziejnaści biełaruskich IT-hihantaŭ EPAM, Wargaming i Viber.
Pa padlikach kv.by, pa vynikach źmien, apisanych u prajekcie, biudžet atrymaje dadatkovyja 35,6 młrd rubloŭ za košt adprybytkovaha padatku i na 1208 młrd za košt adličeńniaŭ u Fond sacyjalnaj abarony. Taksama dziaržava stracić 217,4 młrd rubloŭ z padatku na prybytak.
Fota: park.by
Jak kažuć apytanyja hazietaj kiraŭniki pradpryjemstvaŭ PVT, zaraty na viadzieńnie biźniesu vyrastuć na 15%, što značyć značnyja ŭbytki dla mnohich kampanij, marža jakich zaraz znachodzicca na ŭzroŭni kala 10%.
Taki dakumient naškodzić dziaržavie, adznačaje dyrektar «Biełchard» Ihar Mamanienka: kampanii pačnuć zakryvać ubytkovyja prajekty, źmianšać zarpłaty ci znoŭ stanuć sychodzić u cień.
«Dziaržava, viadoma, moža vyjaŭlać i karać šerych hulcoŭ, ale heta realna składana i doraha bo prahramny pradukt fizična niaisny, — kaža Mamanienka. — Ale samym niebiaśpiečnym nastupstvam hetych papravak moža stać pavieličeńnie kolkaści prahramistaŭ, jakija chočuć emihravać na Zachad praź źnižeńnie zarpłaty i mahčymaściej karjernaha rostu».
***
Dyrektar administracyi PVT Valeryj Capkała raspavioŭ TUT.BY, što «vyklikaje ździŭleńnie sama stratehija Minfina, nakiravanaja na pieraraźmierkavańnie niekim zaroblenych srodkaŭ, a nie na pošuk novych šlachoŭ i krynic prybytku dla krainy».
Kiraŭnik PVT nahadaŭ, što niaźmiennaść śpiecyjalnaha pravavoha režymu Parku vysokich technałohij harantavanaja Alaksandram Łukašenkam dekretam da 2020 hoda.
«Dziakujučy dekretam zamoŭcy, u pieršuju čarhu zamiežnyja, pavieryli ŭ toje, što aryjentacyja krainy na raźvićcio vysokatechnałahičnych vytvorčaściej nosić stratehičny i doŭhačasovy charaktar», - skazaŭ Capkała.