Situacyja na rasijskim rynku zbytu ŭ 2015 hodzie čakajecca vielmi składanaj, zajaviŭ ministr ekanomiki Biełarusi Uładzimir Zinoŭski 20 lutaha na pašyranym pasiadžeńni pastajannaj kamisii pałaty pradstaŭnikoŭ pa dziaržaŭnym budaŭnictvie, miascovym samakiravańni i rehłamiencie.
U miežach kansultacyj biełaruskaha boku ź Minekanamraźvićcia RF była nazvanaja acenka, zhodna ź jakoj Rasija moža skaracić abjom impartu ŭ 2015 hodzie na 30%, paviedamiŭ ministr. «Dla nas heta aznačaje, što biez dyviersifikacyi raźličvać na ekanamičny rost u 2015 hodzie nie davodzicca. Usie schiemy ekspartnaj padtrymki nieabchodna skancentravać na novych rynkach», — padkreśliŭ Zinoŭski.
Dla dyviersifikacyi ekspartu, adznačyŭ jon, nieabchodna ŭ poŭnaj miery vykarystać pieravahi ad udziełu Biełarusi ŭ rehijanalnaj i hłabalnaj intehracyi. «U hetaj suviazi nieabchodnaja sistemnaja praca pa palapšeńni ŭmoŭ dostupu biełaruskich tavaraŭ i pasłuh nie tolki na ahulnym rynku Jeŭrazijskaha ekanamičnaha sajuza, ale i na rynkach usich najaŭnych u śviecie rehijanalnych hrupovak i najbujniejšych krain-imparcioraŭ», — skazaŭ ministr.
Pavodle jaho słoŭ, takaja praca vielmi nieabchodnaja, bo inakš «niemahčyma vieści razmovu ab źnižeńni ryzykoŭnaj zaležnaści ad Rasijskaj Fiederacyi».
Jak paviedamlałasia raniej, sukupny ekspart biełaruskich tavaraŭ u Rasiju ŭ 2014 hodzie skłaŭ 15,34 młrd. dołaraŭ i źniziŭsia ŭ paraŭnańni z 2013-m amal na 1,5 młrd. dołaraŭ.
Asnoŭnaje źnižeńnie prypała na 16 biełaruskich tavaraŭ, ekspart jakich letaś skaraciŭsia na 1,4 młrd. dołaraŭ. Tak, ekspart hruzavych aŭtamabilaŭ u vartasnym vyražeńni skaraciŭsia na 197,5 młn. dołaraŭ (na 23,2%), traktaroŭ i siedłavych ciahačoŭ — na 191,1 młn. (28,8%), małaka i viarškoŭ — na 163,7 młn. (21%), šyn — na 123 młn. dołaraŭ (35,6%).
Akramia taho, istotna źnizilisia ŭ 2014 hodzie pastaŭki ŭ Rasiju mietałapradukcyi, transpartnych srodkaŭ, sielhastechniki, a taksama šerahu charčovych tavaraŭ — kaŭbas i anałahičnych miasapraduktaŭ, śvininy i zamarožanaj jałavičyny.
Na dumku ekanamistaŭ, źnižeńnie biełaruskaha ekspartu ŭ Rasiju abumovili ŭ 2014 hodzie niekalki faktaraŭ. «Biełaruski ekspart źniziŭsia z pryčyny stahnacyi rasijskaj ekanomiki. Akramia hetaha, na źnižeńnie ekspartu ŭ vartasnym vyražeńni paŭpłyvała ŭmacavańnie biełaruskaha rubla da rasijskaha, jakoje nazirałasia da śniežnia 2014 hoda», — miarkuje ekanamist Anton Bałtočka.
