Juryj Šaŭčuk. Fota: vk.com/storts, 2013
Kancerty DDT u Viciebsku, Homieli i Breście prajšli na vysokim uzroŭni, nie horšy vystup čakajecca na «Minsk-Arenie» 26 lutaha. Vystup budzie doŭžycca 2 hadziny i 20 chvilin — jak kaža Šaŭčuk, mieniej prosta nie atrymlivajecca.
Jak śćviardžaje mieniedžar hurta Maksim Mazuroŭski, da kancertaŭ u Biełarusi DDT padychodzić z asablivym natchnieńniem. U Minsku śvietłavaha i hukavaha abstalavańnia budzie ŭdvaja bolš za papiarednija kancerty. Da taho ž, hurt zaraz u dobraj formie — kancert u Minsku moža stać pikam usiaho turu.
Kancert zdymie i pieratvoryć u film kamanda teleprajektu «Lehiendy.Live».
U miežach hetaha prajektu raniej byŭ zrobleny film pa historyi DDT, dzie maładyja muzyki śpiavali pieśni hurta Šaŭčuka. Lidar hurta acaniŭ prajekt jak prosta vydatny.
Na minskim kancercie vykanaje pieśni z novaha albomu «Prozračnyj», a taksama staryja chity. Ceny na kvitki — ad 530 da 960 tysiač.
***
DDT — saviecki, zatym rasijski rok-hurt. Lidar, aŭtar piesień i adziny niaźmienny ŭdzielnik — Juryj Šaŭčuk. Hurt zasnavany ŭ 1980 hodzie u Ufie. U 1983 hodzie atrymali šyrokuju papularnaść paśla vychadu albomu «Kampramis» i vystupu na fiestyvali «Rok za mir» u Maskvie. U 1986 hodzie Šaŭčuk pierajechaŭ u Leninhrad, dzie nanoŭ sabraŭ hurt pad toj ža nazvaj. DDT stanovicca niaźmiennym chedłajnieram na fiestyvalach, adnym z samych viadomych pradstaŭnikoŭ ruskamoŭnaj rok-muzyki.
Hurt zapisaŭ 6 mahnitaalbomaŭ i 15 prafiesijnych studyjnych albomaŭ, 4 kancertnych albomy. Tematyka piesień — ad hramadska-sacyjalnaj i antyvajennaj da ramantyčnaj i fiłasofskaj.
Lidar hurta Juryj Šaŭčuk viadomy aktyŭnaj hramadzianskaj pazicyjaj i krytykaj ułady. Pry razmovie z Uładzimiram Pucinym pradstaviŭsia prosta jak «Jura, muzykant».
