1. U Rasii treba žyć doŭha. I ščaśliva, pažadana. Ale hałoŭnaje — doŭha. Baraćba z Pucinym — heta nie sprynt, heta marafon. Da marafonu hatovyja tolki pasijanaryi, a ich niašmat. A ŭ mianie adna prablema: ja nie chaču źjazdžać. Ja lublu Rasiju. Pryčym heta biez pafasu. Choć časam u Rasii i niazručna, i brudna, i motašna.
2. Za impierskuju paranoju pryjdziecca płacić kožnamu z nas. Zadajcie kožny sabie pytańnie: što vy asabista vyjhrajacie ad anieksii Kryma? I ŭbačycie. Ničoha. Sucelnyja prablemy. I apošniaje. Nam patrebny viečny vorah pobač? Ja maju na ŭvazie Ukrainu i jaje vydatny i blizki nam narod.
3. Pucin ŭmieła kultyvuje ŭ masach rabskuju, pryhońnickuju psichałohiju, umieła nasadžaje ahidny cynizm i paternalizm, umieła tłumačyć narodu: siadzicie cicha, ja samy razumny, ja viedaju, jak vam dapamahčy, hałoŭnaje — nie pieraškadžajcie. Heta katastrafičny scenar dla krainy. Zamiest taho, kab inicyjatyvu padtrymlivać i dać ludziam mahčymaść siabie realizavać, jon abmataŭ usio kalučym drotam.
4. Ja nie revalucyjanier. I nie tolki tamu, što mnie chutka 52 hady, ale ŭ asnoŭnym tamu, što ja vyrazna viedaju, što ŭ Rasii pry revalucyi kroŭ i niepradkazalnyja nastupstvy — heta absalutna realistyčny scenar. Ja vielmi nie chaču kryvavych nastupstvaŭ.
5. Adrazu damahčysia ŭsiaho ŭ Rasii vielmi ciažka. Kraina kansiervatyŭnaja. Ludzi kažuć, što jany drenna žyvuć, ale jak tolki kažaš: davajcie, kab lepš žyć, źnizim padatki, padymiem pryvatny biźnies, zachavajem svabodu słova, — jany kažuć: «NIE TREBA». Kraina kaža: ja biednaja, niaščasnaja, ale ty mianie lepš nie čapaj, tamu, što, nie daj Boh, jašče horš budzie. Treba aściarožna ruchacca napierad.
6. Rasija chvoraja na ekanamičny ŚNID. Jana absalutna nieadaptyŭnaja da vonkavych uździejańniaŭ. Darečy, heta admietnaja asablivaść luboj aŭtarytarnaj sistemy. Jana paśpiachova isnuje, kali ŭsio ŭ paradku, i, jak čyhun, rassypajecca na drobnyja kavałki, kali ŭźnikaje samaja małaja prablema.
7. Pucinizm trymajecca na darahoj nafcie i cenzury. Zabiarycie štości adno — i na nastupny dzień my žyviom u inšaj krainie.
8. Ja liču, što partyja žulikaŭ i złodziejaŭ nie moža doŭha isnavać. Razumiejecie, kožny narod varty svajoj ułady. Ja liču, što Rasija vartaja bolšaha, čym ułada žulikaŭ i złodziejaŭ. Tamu pierśpiektyŭ u «Adzinaj Rasiei» nijakich. Hetaja partyja nie prosta adydzie ŭ niabyt, ale jaje funkcyjaniery rana ci pozna abaviazkova paŭstanuć pierad sudom.
9. Rasijskaja ŭłada baicca ŭłasnaha naroda, rasijskaja ŭłada śmiarotna baicca masavych pratestaŭ i rasijskaja ŭłada robić usio, dla taho kab hetyja pratesty byli.
10. Hałoŭnaje, kab ułada była padkantrolnaja. I hałoŭnaje, kab pravietryvali svoječasova kabiniety.
