Čakałasia, što imia novaha rektara Jeŭrapiejskaha humanitarnaha ŭniviersiteta (EHU) budzie nazvana 2 sakavika. Na hety dzień zapłanavana narada zasnavalnikaŭ EHU, padčas jakoha moža być pryniata adpaviednaje rašeńnie, paviedamili BiełaPAN u departamiencie raźvićcia i kamunikacyj VNU. Pavodle infarmacyi «Našaj Nivy», narada projdzie ŭ zavočnym farmacie.
U ahulnym schodzie suzasnavalnikaŭ udzielničajuć arhanizacyi, jakija spryjali adradžeńniu dziejnaści EHU ŭ Vilni paśla jaho zakryćcia ŭ Minsku. U skład ahulnaha schodu suzasnavalnikaŭ uvachodziać Instytut mižnarodnaj adukacyi (Litva), a taksama amierykanskija fondy «Adkrytaje hramadstva» i «Jeŭrazija».
Nahadajem, u vieraśni 2014 z pasady rektara EHU na pasadu jaho prezidenta pierajšoŭ Anatol Michajłaŭ, jaki zasnavaŭ univiersitet i kiravaŭ im z momantu stvareńnia. Dla abrańnia novaha kiraŭnika byŭ stvorany kamitet pa vybarach rektara — časovy orhan, zasnavany kirujučym savietam EHU.
Svaje kandydatury na pasadu rektara vyłučyli, u tym liku, troje hramadzian Biełarusi — lidar Ruchu «Za Svabodu», fizik Alaksandr Milinkievič, historyk, były prarektar Hrodzienskaha ŭniviersiteta Aleś Kraŭcevič i fiłosaf Taćciana Ščytcova, jakaja vykładaje ŭ EHU.
Na pasadu rektara pretendujuć taksama troje hramadzian ZŠA — Devid Polik, vykanaŭca abaviazkaŭ rektara EHU, prarektar pa raźvićci i kamunikacyi EHU Daryjus Udrys i dyrektar ofisa Instytuta mižnarodnaj adukacyi (Maskva) Edvard Rosłaf.
Šerah hramadskich i kulturnych dziejačaŭ Biełarusi dvojčy — u śniežni minułaha hoda i studzieni hetaha — vykazali niedavier kamitetu pa vybarach rektara EHU z-za zakrytaści jaho pracy. Na ich dumku, rektaram univiersiteta pavinien stać vychadziec ź Biełarusi, a VNU pavinna zachavać biełaruski viektar raźvićcia.
U pačatku studzienia ŭ EHU prajšła studenckaja kanfierencyja, udzielniki jakoj havaryli pra nieabchodnaść praviadzieńnia adkrytych vybaraŭ rektara. Kandydaty na pasadu rektara pavinny prademanstravać «razumieńnie biełaruskaha kantekstu i suviaź ź biełaruskim hramadstvam, a taksama pradumany padychod da finansavych pytańniaŭ, uklučna z płanam pamianšeńnia administracyjnych vydatkaŭ EHU», havaryłasia ŭ vynikovym dakumiencie studenckaj kanfierencyi.
Jeŭrapiejski humanitarny univiersitet adkryŭsia ŭ Minsku ŭ 1992 hodzie. U 2004-m biełaruskija ŭłady, niezadavolenyja samastojnaściu kiraŭnictva EHU, začynili VNU. Praz hod jon adnaviŭ pracu ŭ Vilni, dzie maje status biełaruskaha ŭniviersiteta ŭ vyhnańni. U VNU vučacca prykładna paŭtary tysiačy studentaŭ, pieravažna ź Biełarusi.
Bolš za hod tamu pamiž administracyjaj i sienatam EHU paŭstaŭ kanflikt, źviazany z praviadzieńniem reformy prafiesarska-vykładčyckaha składu. Hrupa vykładčykaŭ, jakaja vystupaje suprać palityki administracyi, zasnavała płatformu «Za novy EHU». 1 kastryčnika 2014 bolšaść ź ich pazbavilisia pracy — ź imi nie praciahnuli pracoŭnyja kantrakty.
