Konsuł Ukrainy ŭ Maskvie Hienadź Breskalenka paviedamiŭ ab tym, što miesca znachodžańnia hramadzianki Ŭkrainy Hanny Duryckaj, jakaja supravadžała rasiejskaha apazycyjaniera Barysa Niamcova pad čas zabojstva, pakul nieviadoma.
Pa słovach konsuła, jaki prybyŭ u Śledčy kamitet Rasiei, sustrecca z 23-hadovaj dziaŭčynaj jamu nie ŭdałosia.
Dyplamat zajaviŭ, što Duryckaja ŭ statusie śviedki maje prava pakinuć miežy Rasiei, pakolki nie źjaŭlajecca jaje hramadziankaj.
«Pakolki Duryckaja znachodzicca ŭ statusie śviedki, jana moža bieśpieraškodna pajechać dadomu va Ŭkrainu», — zajaviŭ Hienadź Breskalenka.
U toj ža čas narodny deputat ad partyi «Narodny front» Astap Siemiarak u kamentary radyjo «Svaboda» paćvierdziŭ, što pytańnie pra miescaznachodžańnie Hanny Duryckaj znachodzicca na kantroli ŭkrainskaha konsuła ŭ Maskvie. Pavodle słoŭ deputata, da jaho źviarnulisia svajaki dziaŭčyny, jakija śćviardžajuć, što nia viedajuć, dzie jana ciapier znachodzicca.
«Jana kaža, što jaje pavieźli na niejkuju kvateru. Tam jość achova. Pakinuć hetaje pamiaškańnie joj nie dazvalajuć», — raspavioŭ Astap Siemiarak sa spasyłkaj na słovy svajakoŭ dziaŭčyny.
Deputat taksama adznačyŭ, što Hanna peryjadyčna vychodzić na suviaź, ale nia viedaje, dzie jaje trymajuć. Śledčy kamitet Rasiei pakul infarmacyju nie kamentuje.
Barysa Niamcova zabili pozna ŭviečary 27 lutaha na Vialikim Maskvareckim moście ŭ Maskvie niedaloka ad Kramla. Palicyja raśśleduje fakt pa artykule ab zabojstvie.
