Archieołahi znajšli ŭ džunhlach Ła-Maskityi, Handuras, ruiny lehiendarnaha horada-dziaržavy, jaki naležyć da nieviadomaj navucy cyvilizacyi, paviedamlaje Fox News.
Malunak Horada boha małpaŭ Viordžyła Finłeja
Čutki pra tajamničy horad u nieprałaznych džunhlach chadzili jašče z časoŭ kankistadoraŭ, jaho nazyvali «Horadam boha małpaŭ» albo «Biełym horadam». U 1939 hodzie amierykaniec Teador Mord zajaviŭ, što bačyŭ horad, kali pralataŭ nad im na samalocie. Ale avanturyst zahinuŭ u avijakatastrofie da taho, jak paviedamiŭ pra miescaznachodžańnie ruin.
Videa 2013 hoda pra ekśpiedycyju ŭ Handuras:
Pošuki kamandy archieołahaŭ z sučasnym abstalavańniem pačalisia ŭ 2012 hodzie. Ciapier navukoŭcy byli ŭzbrojenyja lidarami i kampjutarami, z dapamohaj jakich možna z bortu viertalota zbudavać 3D-madel pavierchni pad listotaj dreŭ. Kamandu daśledčykaŭ achoŭvali 16 handuraskich śpiecnazaŭcaŭ.
Navukoŭcy miarkujuć, što znajšli toj samy «Bieły horad», pra jaki Kartes pisaŭ impierataru Karłu V. Kankistador čuŭ ad miascovych žycharoŭ pra cyvilizacyju, roŭnuju actekam pa bahaćciach.
Daśledčyki nanieśli na karty ścieny, płoščy, kurhany i piramidu nieviadomaha horada. U horadzie jany znajšli 52 artefakty, u liku jakich i hałava skulptury «čałavieka-jahuara».
Miescaznachodžańnie horada navukoŭcy nie raskryvajuć, bo bajacca napłyvu maradzioraŭ.
