U Biełarusi nie buduć abaviazvać pryvatnych uładalnikaŭ nieruchomaści vyznačać staŭki arendnaj płaty vyklučna ŭ biełaruskich rublach. Pra heta havorycca ŭ kamientary Dziaržkamiteta pa majomaści. 

Staršynia Dziaržkammajomaści Andrej Hajeŭ adznačyŭ, što vyniesieny na šyrokaje abmierkavańnie prajekt ukaza prezidenta «Ab uniasieńni źmianieńniaŭ i dapaŭnieńniaŭ va ŭkaz prezidenta Respubliki Biełaruś № 150 ad 29 sakavika 2012 h. «, najpierš stavić metaj udaskanaleńnie arendnych adnosin. Tamu Dziaržkamitetam pa majomaści ŭvažliva byli vyvučanyja ŭsie zaŭvahi i prapanovy pa normach novaha dakumienta, što pastupili ŭ viedamstva. 

«Na siońniašni dzień arhumientavanych mierkavańniaŭ «suprać» dedałaryzacyi arendy pryvatnaj nieruchomaści značna bolš, čym «za», — adznačyŭ kiraŭnik Dziaržkammajomaści. 

Prychilniki abhruntoŭvajuć nieabchodnaść pryniaćcia novaj normy vypadkami rostu arendnaj płaty ŭ suviazi z rostam kursu amierykanskaha dołara i jeŭra, ź jakimi sutyknulisia indyvidualnyja pradprymalniki i jurydyčnyja asoby. 

Asnoŭny dovad praciŭnikaŭ pryniaćcia normy, jakaja praduhledžvaje ŭstanaŭleńnie arendnaj płaty za abjekty nieruchomaści pryvatnaj ułasnaści ŭ biełaruskich rublach ci bazavych arendnych vieličyniach sa štohadovaj karekciroŭkaj, zvodzicca da taho, što pryniaćcie hetaj normy budzie spryjać pamianšeńniu zamiežnych inviestycyj, rostu arendnaj płaty ŭ biełaruskich rublach, pakolki arandadaŭcy buduć zakładvać ryzyki ŭ arendnuju płatu. Taksama, z ulikam hetych ryzyk, vierahodna spynieńnie budaŭnictva novych abjektaŭ pryvatnaj ułasnaści, z nastupnym skaračeńniem zamoŭ rabot dla biełaruskich prajekciroŭščykaŭ, padradčykaŭ, pastaŭščykoŭ i budaŭnikoŭ. 

Pradstaŭniki biźnies-sajuzaŭ adznačyli, što inicyjatyva dedałaryzacyi arendnych adnosin uvohule nosić prahresiŭny charaktar, adnak pavinna prymianiacca ŭ kompleksie inšych mier, adznačajuć u Dziaržkammajomaści. 

Raniej ekśpierty vykazvali mierkavańnie, što pryviazka arendnych stavak da rubla dla pryvatnych abjektaŭ kamiercyjnaj nieruchomaści moža pryvieści da zamarožvańnia niekatorych handlovych i biźnies-centraŭ, jakija budujucca, a taksama paharšeńnia inviestycyjnaj pryvabnaści rynku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?