Pieršy krymskatatarski telekanał ATR spyniŭ viaščańnie ŭ poŭnač 1 krasavika z-za admovy Raskamnahladu zarehistravać jaho. U tranślacyi na sajcie telekanała ciapier adlustroŭvajecca tolki čorny ekran, paviedamlaje «Doždž».
U apošniuju hadzinu viaščańnia namieśnica hienieralnaha dyrektara telekanała Lila Budžurava dała słova zasnavalniku Lenuru Iślamavu. Jon paabiacaŭ zrabić usio dla adnaŭleńnia viaščańnia.
Lila Budžurava adznačyła, što rašeńnie ab zakryćci telekanała ATR «ŭdaryła nie pa telekanale, a pa ŭsim narodzie».
«My i nie takoje pieražyvali. Naš narod pieražyŭ Stalina. Niaŭžo nie pieražyvie ciapierašnija prablemy? Pieražyvie. I vyžyvie. I budzie dalej budavać svoj dom na svajoj ziamli», — zajaviła jana.
Jana padkreśliła, što «tym, chto pieražyŭ departacyju i hady žyćcia ŭ reziervacyi, było ciažej, čym ciapier».
«My viedajem, što vierniemsia!» — dadała jana praź ślozy.
Hiendyrektar kanała Elzara Iślamava raniej raspaviadała, što licenziju na viaščańnie kanału admovilisia vydać paśla nieadnarazovaj padačy nieabchodnych dakumientaŭ. Z 25 sakavika na kanale prachodziŭ telemarafon «Nie zabivajcie ATR», padčas jakoha ŭ kucie ekrana pakazvaŭsia zvarotny adlik času da spynieńnia viaščańnia.
Na pres-kanfierencyi zasnavalnik miedyjachołdynha zajaŭlaŭ, što na kiraŭnictva akazvajecca cisk z metaj prymusić pradać kanał. «Ci ty pradasi, abo my zabiarem siłaj, — zajaŭlaŭ Iślamaŭ. — My zabrali toje, zabrali hetaje, zabiarem i hetaje — ty što dumaješ, chtości pryjdzie ciabie abaraniać, ci što?»
Akramia samoha kanała ATR, spynili viaščańnie i kanał Lale i radyjostancyi «Lidar» i Meydan.
Telekanał ATR vioŭ viaščańnie z 2006 hoda.
Krymskija tatary vystupajuć za Krym u składzie Ukrainy. Heta 400-tysiačny narod, karenny ŭ Krymie. Da 1900-ch tatary składali bolšaść na paŭvostravie. U 1944 tataraŭ z Kryma departavali, paŭvostraŭ zasialili imihrantami, pieravažna z Rasii.
