«Komsomolskaja pravda v Biełarusi» zamachnułasia na śviatoje — raspaviała čytačam ab płanach demantažu Nacyjanalnaj biblijateki. Budynak pavinny pieravieści ŭ mahiloŭski «Dysnejłend», papiarednie prybudavaŭšy źvierchu jašče adzin ałmaz. A na byłym miescy biblijateki pabudujuć samy vialiki ŭ Jeŭropie futbolny stadyjon, piša «Kamsamołka».
Jašče adna «kačka» ad «Kamsamołki» — ustalavańnie pryžyćciovaha pazałočanaha pomnika Domračavaj kala «Minsk-Areny».
«Narodnyja naviny Viciebska» paviedamili ab vializarnym soniečnym hadzińniku ŭ vyhladzie sałdata, jaki źjavicca na hałoŭnaj płoščy horada da 9 Maja. Pavodle prajekta, hnomanam hadzińnika stanie štych, jaki sałdat ściskaje ŭ ruce. Aproč taho, kožnuju hadzinu z navakolnych kałonak buduć hučać savieckija pieśni ab vajnie.
Biełaruski mikrabłohier @belamova tvitnuŭ fejkavuju navinu ab tym, što cana nafty abrynułasia da 39$ za barel. Na heta pavioŭsia dyrektar Mižnarodnaha instytuta stratehičnych daśledavańniaŭ.
Dziaržaŭny tielekanał ANT raspavioŭ, što nieŭzabavie biełaruskija vytvorcy pačnuć vyrablać zamarožany biarozavik, a na sajcie Naviny.by źjaviŭsia artykuł ab budoŭli hrandyjoznaha tunela pad Biełaruśsiu i Litvoj, jaki złučyć Rasiju z Kalininhradam.
Sajt «Tajha.info» 1 krasavika paviedamiŭ, što budaŭnictva čaćviortaha mosta ŭ Krasnajarsku spyniena praź siensacyjnaje vynachodnictva sibirskich navukoŭcaŭ. Tyja adšukali ŭ rajonie budoŭli reštki staražytnaj cyvilizacyi. Papiarednija archieałahičnyja daśledvańni kažuć ab tym, što razmova idzie ab novym, dahutel nieviadomym typie ludziej, ad jakoha mierkavana i pačałosia zasialeńnie ŭsiaho śvietu.
Brytanskaja Mirror napisała ab novaj sistemie, praź jakuju ciapier buduć pryznačacca ministry. Tak, pavodle haziety, sakretny sacsietkavy ŭrad budzie manitoryć sacyjalnyja sietki padčas vybaraŭ, i, hruntujučysia na mierkavańni karystalnikaŭ, abirać ludziej na pasady ministraŭ. Taksama ŭ artykule čytačam prapanujecca acanić novuju elektaralnuju formu.
A infarmavanaje brusielskaje vydańnie EUobserver napisała, sa spasyłkaj na Fiederyku Mahieryni, što Francyja pieradaść viertalotanoscy «Mistral», jakija pavinny byli pradać Rasii, dypłamatyčnaj słužbie Jeŭrasajuza. Mnohija rasijskija ŚMI «navinu» pieradrukavali.
A Google da 1 krasavika zrabiła staronku «naadvarot» i zapuściła hulniu «Pacman» na huhł-mapach.
