U redakcyju «NN» źviarnuŭsia čytač z Homiela Jaŭhien, jaki zaŭvažyŭ, što miascovy Red Pub 3 krasavika pravodzić viečarynu «Ruski duch». I heta zusim nie pieršakrasavicki žart.
«My robim kalektyŭny chop-chej-łała-łej na samaj dušeŭnaj i rodnaj dyskatecy «Ruski duch», — pišacca na staroncy viečaryny ŭ «Ukantakcie». —
Lekavaja vadčełła ŭ duecie z huročkam salonym dadaść usim siłaŭ i enierhii! Usio budzie pa staroj tradycyi: dzieŭki — haračyja, mužyki — ščodryja, pieśni ŭsim viadomyja».
Pišacca, što ŭ niekatorych haściej viečaryny budzie mahčymaść vypić biaspłatnaj harełki.
Vyśviatlajecca, što takija viečaryny ŭ Homieli prachodziać užo nie ŭpieršyniu. Papiaredniaja prajšła 20 sakavika. Moładź fotkałasia z šyldačkaj «Ruski duch», a taksama ź vialikaj matroškaj. Dy-džei byli ŭ ruskich nacyjanalnych strojach.
«NN» patelefanavała art-dyrektaru Red Pub Ninie Sierabrovaj, kab daviedacca ŭ čym sens hetych mierapryjemstvaŭ? Najpierš spadarynia Nina paprasiła razmaŭlać pa-rusku, bo jana sama z Rasii i kiepska razumieje biełaruskuju.
«Tak, sapraŭdy, my nie ŭpieršyniu pravodzim takija viečarynki. Jość arhanizatary, jakija zdymajuć u nas pamiaškańnie».
Na kaho nakiravanaja viečaryna «Ruski duch»: na biełarusaŭ ci rasijan? «My tak hłyboka nie kapajem, — kaža art-dyrektar ustanovy. – Ludzi prosta prychodziać adpačyvać, dobra bavić čas».
Dalej razmaŭlać spn.Nina admoviłasia. «Siabry, my ŭžo chutka saljemsia ŭ dušeŭnym tancy «Ruskaha duchu», — pradčuvaje staronka Red Pub «Ukantakcie».
Nahadajem, što ŭ listapadzie letaś minski kłub Dozari pravodziŭ viečarynu «Ruskim być modna», ale ŭ vyniku padniataj u presie šumichi arhanizatary byli vymušanyja pravieści viečarynu «Hrandyjoznaje nacyjanalnaje šou».
