Kali aficyjna, to dezierty (desert boots, ad anhł. Desert — «pustynia») — boty na skuranoj abo humovaj padešvie z zamšavym viercham z dvuma ci tryma parami adtulin dla šnurkoŭ. Źjaŭlajucca kopijaj čaravikaŭ, jakija brytanskija vajennyja nasili ŭ Jehipcie padčas Druhoj suśvietnaj vajny jak paŭsiadzionny abutak dla adpačynku. Takija čaraviki vyrablali ŭručnuju miascovyja žychary.
U masavuju vytvorčaść dezierty trapili dziakujučy Natanu Kłarku, jaki vypuściŭ hety typ abutku pad markaj Clarks u 1950. Jon sam nasiŭ takija čaraviki padčas słužby ŭ Mjanmie. U 1950 hodu dezierty byli pradstaŭlenyja na abutkovaj vystavie ŭ Čykaha.
Paźniej dezierty stali elemientam harderoba bitnikaŭ i modnikaŭ. Takija čaraviki nasili Styŭ MakKuin, udzielniki hrupy The Beatles, Bob Dyłan. U 70-ch hadach dezierty vyjšli z mody. Novy ŭsplosk papularnaści adbyŭsia ŭ 1990-ja hady.
Dezierty vonkava padobnyja na čaraviki čuka (ci jašče ich nazyvajuć čaka), raznavidnaściu jakich jany i źjaŭlajucca.
Prync Hary
Dezierty i čuka: ci jość roźnica?
Roźnica jość, ale nieistotnaja. Pa sutnaści, dezierty — heta padvid čaravikaŭ čuka, jakija źjavilisia troški raniej. Vonkava abiedźvie madeli vielmi padobnyja, i miežy, jakija adroźnivajuć adnu madel ad inšaj, vielmi razmytyja.
Strohija ekśpierty adnosiać da deziertaŭ vyklučna zamšavyja čaraviki i tolki z dvuma parami adtulin dla šnurkoŭ. Takim čynam, da čuka možna adnieści tyja madeli, u jakich bolšaja kolkaść adtulin i jakija zrobleny sa skury. Čuka taksama mohuć być krychu vyšejšyja za dezierty, a padešva ŭ ich moža być skuranoj abo humovaj.
Hetyja adroźnieńni nie asabliva prykmietnyja, dy i viedać heta varta chiba pradaŭcam dy vytvorcam.
Za što lubić i nasić?
Čamu brytanskija vajskoŭcy tak palubili desert boots?
Dastatkova prosta adzin raz nadzieć ich, kab daviedacca adkaz — krepavaja padešva i miakkaja zamša minimalna nahružajuć nahu. U ich nie chodziš, a lataješ. Što mahło być słušniej va ŭmovach badziańniaŭ pa pustyni?
Pry ŭsioj zručnaści abutku jość u ich i advarotny bok, asabliva dla našaha klimatu i realij. Kaŭčuk, taki miakki i cudoŭny, davoli chutka ścirajecca.
Karysnaja parada, jakaja dazvolić praduchilić ścirańnie padešvy vašych desert boots — starajciesia nie nasić ich zanadta časta. Tak i jość. Za adzin siezon dezierty znasicca nie pavinny, a kali vy budziecie ich čarhavać z druhim abutkam, jany prasłužać nie adzin hod. Nu, ci pastaŭcie adrazu prafiłaktyku na padešvu, i prablema źniknie.
A ahułam ich možna nasić amal kruhły hod, vyklučajučy, zrazumieła, surovyja zimovyja miesiacy i asabliva brudnaje mižsiezońnie. I ich sapraŭdy možna abuvać letam. Kažuć, što ŭ ich nie śpiakotna. Nie darma ž ich nasili ŭ pustyni. Karaciej, univiersalnaść ich nie pierabolšanaja.
Z čym spałučać?
Dy amal z usim.
Jak z džynsami, tak i sa štanami, ale biez strełak. Pravieranaje časam i nie adnym pakaleńniem brytanskich turystaŭ spałučeńnie — dezierty i padkasanyja štany čynas. Naohuł dobra, kali dezierty całkam vyhladvajuć z-pad štanoŭ.
Štany čynas
Ci možna nasić dezierty z kaściumam?
Nie, nielha. Jość, viadoma, tyja, chto spałučaje, ale my nie raim.
Škarpetki?
Jašče raz varta nahadać, što dezierty ŭniviersalnyja. Jany nie patrabujuć składanych duetaŭ sa škarpetkami. Jość dva varyjanty, niezaležna ad taho, jakija na tabie džynsy abo štany: zvyčajnaj daŭžyni, skaročanyja abo padkasanyja. Možna nadzieć karotkija škarpetki luboha koleru — ich prosta nie budzie vidać u dosyć vysokich deziertach. Druhi varyjant — doŭhija škarpetki, jakija spałučajucca z koleram štanoŭ. Dezierty možna nasić i biez škarpetak.
Košt?
Čytačy paprasili paznačać košt na abutak, što my z asałodaj i robim. Na papularnym sajcie asos.com ich možna znajści ad 54 jeŭra.
