Pieršy namieśnik staršyni hramadskaha abjadnańnia «Tavarystva biełaruskaj movy imia Franciška Skaryny» (TBM) Alena Anisim nie admoviłasia ad namieru vyłučacca kandydatam na prezidenckich vybarach 2015 hoda.
fota Siarhieja Hudzilina
«My pracujem u hetym kirunku, razmaŭlajem ź ludźmi z roznych arhanizacyj, raspracoŭvajem prahramu. Ja pracuju nad tym, kab stvaryć kamandu i vyłučacca, jak tolki buduć abvieščanyja vybary», — paviedamiła BiełaPAN Anisim.
Pavodle jaje słoŭ, ciapierašniaja situacyja «zmušaje reahavać i iści dalej». «Tak atrymałasia, što na palityčnym poli nacyjanalna-patryjatyčnyja siły zaraz praktyčna nie prysutničajuć. Heta zmušaje iści napierad. Viadoma, možna było b z kimści abjadnacca, delehavaŭšy svaje hałasy, ale pakul tak dziejničać niama z kim», — skazała pieršy namieśnik staršyni TBM.
Anisim nahadała, što ŭ kancy 2014 hoda prajšoŭ Kanhres za niezaležnaść. «Było vielmi važna, kab byŭ pačuty hołas patryjotaŭ Biełarusi, jakija zaniepakojenyja niaprostymi hieapalityčnymi ŭmovami, tym, što nieabchodna zachavać u pieršuju čarhu niezaležnaść krainy. Adnak my sutyknulisia z tym, što apazicyjnyja palityki da hetaha nie hatovyja», - adznačyła jana.
Pa słovach Anisim, niezaležnaść «treba ŭzmacniać znutry, abapirajučysia na hramadzian, a nie tolki na tyja apazicyjnyja struktury, jakija pracujuć užo šmat hadoŭ». «Apazicyjnyja palityki — dobryja ludzi, ale, vidavočna, u niečym jany pamylajucca stratehična», — miarkuje jana.
Udzielničać u prezidenckich vybarach płanuje jašče adna žančyna — aktyvistka kampanii «Havary praŭdu» Taćciana Karatkievič. Arhanizacyja prapanuje vyłučyć jaje kandydatam u prezidenty ad prajektu «Narodny refierendum» (jon abjadnoŭvaje «Havary praŭdu!», Biełaruskuju sacyjał-demakratyčnuju partyju (Hramada), Partyju BNF i ruch «Za Svabodu»). Rašeńnie padtrymać kandydaturu Karatkievič ŭžo pryniała palityčnaja kamisija Partyi BNF. BSDP (Hramada) i ruch «Za Svabodu» ŭ hetym pytańni pakul nie vyznačylisia.
Čarhovyja prezidenckija vybary pavinny prajści ŭ Biełarusi nie paźniej za 20 listapada. Najbolš vierahodnaj dataj ich praviadzieńnia ŭ CVK nazyvali 15 listapada.
